Həcci misliş nıbə mənəvi iyən iştimayi zərfiyyət
Həcci misliş nıbə mənəvi iyən iştimayi zərfiyyət
Həcci mərosim ilahi dıjdə vocibatonkuye ki,Kərimə-Ğıron iyən hədisonədə bəçəy bə vırə rosney vey təkid bıə. əmmo ım muhim iyən mənəviyə mərosimi bərpo kardey bə qıləy əmniyyət iyən oroməti ehtiyocış heste ki,qıləy hoci çəy şua jiyədə kardey bızıno ıştə həcci əməlonku ziyodə foydə bobəy.Həşi sori 1394-ədə (Miladi 2015) dıqlə hodisədə yəni Məscidul-Hərəmədə qıləy dıjdə rost kardə krani qıniye iyən Minada çandə həzo hociyon kıştey hodisə ki,çəvon 464 xonəxoş ironıj be,bə qırd mısılmınon iyən hociyon telə təsirış noə.bə həmınə dəlili xoto dəvardə sori tələbışon karde ki,Ərəbıstoni rəsmi şəxson bo ironıjə hociyon əmniyyəti təmin kardey kafiyə təzminaton bıdəyn.əmmo bə nəzə rəseydə ki,ımsornə cari sorədə Ərəbıstoni hukumət ım təəhudonış bəştə gıy peqətəşe iyən ğəbulış kardə və İron həm ısət bo həcci mənəviyə əzəmətinə mərosimi bərpo kardero,ıştə hociyon əyo vığandedə.
İroni hociyon bə Həcci mənəviyə mərosimi vığandey astanədə,çın mığəddəsə mənasiki bərpo kardə məsul şəxson bə İron İslom Respublikə Yolə Rəhbər həzrət Ayətullah Xameneyi huzur omin iyən ıştə kardə koon barədə məlumatonışon doe.Yolə Rəhbər bın vindemonədə bə Bəğərə mıborəkə surə 125-ə ayə ibaxşiş işorə karde iyən çı Həcci mərosimi əmniyyəti əhəmiyyəti həxədə ın bəyonatonışon hamye:”...ğəziyyə ıme.Kərimə-Ğıron de ojə-oşkoə holəti hamyedə ki,əmə ın vırəmon bo milləti şe-omeyro əmniyyətinə vırə ğərol domone.betəhlukəti xeyli muhimme.əmə 1394-ə sori Həcci telə ğəziyyə çı yodomon bekardəni.bə islomi umməti dıli qıləy doğ qıniye iyən çəmə ironıjon dılış dojne ki,ım hiçfaxti çı yodo benıbebəşe.”
Həlbəttə ə həzrəti təkidış karde ki,ğərəz əmniyyət,çı hociyon izzət iyən asayiş həm bəbe hifz bıbu ta hiç qıləy norohətçəti nıbə holədə deştə Həcci mərosimi məşğul bıbon.
Qırd dınyoədə kə soybə məmləkət ıştə mehmon iyən mısofiron əmniyyəti təmin kardedə.Beytullahul-Hərami hociyon ğəbul kardə kişvər həm ki,Səudiyyə Ərəbıstone,bəbe bo hociyon qıləy orom iyən betəhlukəninə muhit hozzıkəy iyən bəştə bın vəzifə əməlkəyn.harçənd ım devlət çandə kərə nışonış doə ki,çın koy ohdəku dısırstə şikilədə omey zıneydənin.əmmo İron İslom Respublikə umudəvoye ki,həni navkonə faciyəon tikror nibəbe.
Yolə Rəhbər İron İslom Respublikə ıştə hociyon bə Məkkə vığandey ğəroli barədə hamyeşone: ”xoşbəxtonə hukuməti muhtərəmə məsul şəxson Milli Əmniyyəti Aliyə Şurədə cəm bıən,fikışon kardə, ğəziyyə co cəhətonku bəhsışon kardə və oxoyədə bə ın nəticə rəsən ki,Həcci bərpo bıbu.umudəvom ki, inşaallah ım həcci mərosim de vey çokə formə bə əməl boy.”
Həcci mərosimədə bo ironıjə zayiron iştirok kardeyo bıə qırd ım confəşonəti qıləy fərdi iyən iştimayi təsirış heste.İslomi İnğılobi Yolə Rəhbər ım ilahi mənəviyə fərizə həxədə hamyeşone:”Həcc qıləy vey muhimmə fərizəy.ğasbu əmə çı islomi muhimmə fərizəon miyono bənə Həcci muhimmə fərizə iyən vocibatımon ni.əvvəla bın dıjd iyən hevujə fərizədə ziyodə mənəviyə zərfiyyəton movcude ki,de Həzrəte Həxı(Xıdo) mənəviyə rabitə bərğərol kardey dumo bıə kəson,kardey bəzıneyn çın vocibat iyən fərizə kınconədə ziyodə imkonat və əcibə zərfiyyət pəydukəyn...ehanə ğədr bızınəmon həcci zərfiyyət çı qırd co vocibaton zərfiyyətisə veye.
Bə ın mənəviyyati dast pəydu kardero Yolə Rəhbəri sıfarış iyən təkidış karde ki,hociyon Məscidul-Həram iyən Məscidun-Nəbiiyədə camaat nımojonədə iştirokkəyn,Kərimə-Ğıroni tilovətkəyn və bə Ərəfə ruji əməlon dığğətkəyn. ə həzrəti həmçinin hociyon de dınyo koon ıştə sə tasponeyış mızəəmmət karde və voteşone ki, Həcci ğəziyyə və məsələdə həmmə koysə vey bəbe qıləy hoci bın fikədə bıbu ki,ıştəni çoko pokkəy,ıştə dıli pokkəy,ıştə rufi pokkəy.kardey bızıno inşaallah bə qıləy dıjdə nəticəon dast pəydukəy. əgər jıqo nıbu,bə zəmon Həcci iştimayi nəticəon həm de ilahi tofiğ iyən ovandəti hosil nibəbe.
