Beniğobə Amerkə
Beniğobə Amerkə
Dəvardə haftədə Amerkə prezdent Donald Tarmp çın kişvəri konqresi bə İron,Rusiyə iyən Şimoli Koreya ələyh bekardə bıə ğanunış imzo karde.çın hərəkəti dumo ım se qılə məmləkət iyən dınyo iştimaiyyət çı Amerkə ın hərəkətışon de şiddəti tənğıd karde.co tərəfiku dəvardə haftəku çı Trampi rısvoyçəti iyən dardısəron dəvomış heste.itərəfiku həm informasiyə vositəon çı Amerkə prezdenti de Avstraliyə iminə vəzir iyən Meksikə prezdenti kardə cəncolinə sıxanon mətnışon bə dast vardə iyən co tərəfiyo çı Rusiyə bə Amerkə vıjnemoni mudoxilə məsələ yəni “Rusiyə-Tramp” dosye xoto icod bıə munsifon heyət təşkil be.ım qıləy holədəbe ki,Amerkə Senat bə federal təhğiğat idorə(FBİ) tojə rəyisi ray iyən sədoş doe iyən Amerkə Sərprokur həm elon kardeşe ki,afrikəku omə amerkəvıjon fəğət 30 fayiz camaat bə polisi etımodışon heste.oxoyədə həm Amerkə Xarici Koon Vəzərotxonə rəsmən çın kişvəri de “Qlobal Qam bıey Mıborizə bardə Parisi Mığovilə”-ku xaric bıeyış elon karde iyən “Pyo”muəssisə elanış kardə ki,Dınyo İştimaiyyət çı Amerkə təhdidonku norohətin.
Dəvardə haftə Amerkə Konqresi bə İron,Rusiyə iyən Şimoli Koreya ələyh bekardə şiddətinə sanksiya ğanuni bekardey de daxili iyən xarici reaksiyaon dimbədim ome.ım hərəkət əxtə problemış icod karde ki, Donald Tramp həm şəxsən ımış tənğıd karde.Amerkə prezdenti bın bəyoniyyədə voteşe ki,bo milli vəhdəti hifz kardero ım sənədış imzo karde iyən çəy məğlubiyyət ısətiku məlume.Tramp həmçinin xarici siyosəti sahədə Konqresi bə Amerkə prrezdenti ixtiyorat iyən səlohiyyəton mıdoxilə kardey koyış həm tənğıd kardeşe.bə ğanuni əsos,bə İron,Rusiyə iyən Şimoli Koreya ələyh bıə sanksiya koyədə iminə kərəy ki,çı Amerkə prezdentiku bo sanksiyaon kam kardey barədə bıə məsləhıt kardey səlohiyyət çəy dastiku sıə bıə.de qıləy co iborəti bə Rusiyə ələyh bıə sanksiyaon bə təxır eğandey koyədə prezdent bəbe sıftədə Konqresi ray cəlbko.qıləy mevzuye ki,çı Amerkə prezdenti de Konqresi miyono ixtilofinə məsələonku bə hisob omeydə.de ın holi Tramp bə Rusiyə ələyh bıə qrupi təsiri ji dəşey iyən çəy İroni Ətomi Təvafuği məsələdə problemon icod kardey xoto çı Konqresi bekardə ım sənədış imzo kardə.çımi mığobilədə ım se qıləy məmləkət yəni İron,Rusiyə iyən Şimoli Koreya elonışon kardə ki,bə ın məsələ lozım bıə reaksiyaon nışon bədon.Rusiyə devləti elonış kardə ki,çəy məmləkəti de Amerkə miyono rabitəon çok bıey koyku komilə surətədə noumud bıə.həmçinin İron İslom Respublikə bə Amerkə ım ko qıləy mınosibə cəvob doeyku xəbəş doe.oxoyədə Şimoli Koreya de qıləy tojə rəketi test kardey bə Amerkə ım deşmınə hərəkəton qıləy cəvobış doe.
Dəvardə haftədə çı Amerkə prezdent Trampi rısvoçətiyon iyən dardısəron həmçinin dəvomış hestebe. jıqo təsəvvır bedəbe ki,qıləy bə pensiyə beşə general Con Keli nəzmı-intizomi bə Sipiyə Kə obəqordıne. əmmo Trampi de Avstraliyə iyən Meksikə yolon mukalimə mətni intişori xəbə nışon doydə ki,Sipiyə Kədə hərcı-mərcəti ijən dəvomış heste.Amerkə informasiyə vositəon dəvardə haftə xəbəşon doe ki,Tramp de Avstraliyə iminə vəziri telefoni sıxani zəmonədə elonış kardə ki,əv de ironi Ətomi Silhi təşəbbısi proqrami ıştə mıxolifətış heste iyən jıqo qıləy təvafuğnomə əy bəkışte.Trampi həmçinin bə Meksikə prezdenti votəşe ki,hətto əgər Meksiko-Siti bo divo soxteyro bıə puli doey fikış həm nıbu,ımi oşko iyən ələni surətədə elon nıko.ım qıləy holədəy ki,trampi de meksikə prezdenti qəp jıə mukaliməon ifşo bıey,nışon doydə ki,çəy sıxan iyən rəftorədə qıləy ziddiyət heste.
