Avropə İttifoğiyədə de Rusiyə rabitıon barədə ixtilofon ziyod bıey.
Avropə İttifoğiyədə de Rusiyə rabitıon barədə ixtilofon ziyod bıey.
Harçənd Avropə İbemoni de Rusiyə rabitəon Miladi 2014-ə soriku bə Ukraynə behroni xoto sard bıə iyən çəvon miyono ixtilofon ziyod bıə,əmmo de ın holi Avropə İttifoği muhimmə uzvon məxsusən ğərbi avropədə meylışon heste de Rusiyə mıxtəlif ixtisodi baxşonədə,məxsusən enerji sahədə həmkorətiyonış movcud bıbu.
De ın holi ısət ın rabitəon çı Tarmpi prezdendəti zəmonədəbə bə Rusiyə zidd bıə Amerkə siyosəton təsiri jiyədə ğərolış qətə.Vaşinqtoni bə uruson əlyh bıə hərəkəton,məxsusən bə Rusiyə ələyh tojə sanksiyaon ki,bə Rusiyə enerji baxşi təsirış noə,bə Atlantik okeyani dıqlə tərəfədə bıə kişvəron miyono ixtilofi buruz bıey boyis bıə.Amerkə hakimiyyəti bə Rusiyə zidd tojə sanksiyaon bə Avropə İttifoği de Rusiyə miyonobıə rabitəon ixtisodi iyən ticori baxşon həm təsirış noə iyən Avropə İttifoği bımi qıləy şiddətinə reaksiyaş nışon doə.Amerkə devləti bə Rusiyə ələyh bıə sanksiyaon,həyğətədə bə Avropə İbemoni ələyh qıləy ixtisodi təzyiğ hisob kardey bəbe ki,beşəkım hərəkət bə Vaşinqton-Brukseli dı tərəfinə rabitəon zərəl bərosne.bə ın proseson dığğət kardeyədə mışohidə bedə ki,ehanə Rusiyə ixtisodi blokada mevzu,çı Brukseli de Vaşinqtoni miyono qıləy çi hosil nıku,Avropə İbemon bə Amerkə ələyh əvəz beşə hərəkaton əncom bədoe.
Amerkə bə Rusiyə ələyh sanksiyson sırfən bə Atlantik okeyani dıqlə tərəfədə bıə məmləkəton ixtilofon ziyod bıey boyis bıəni,bəlkəm ısət ım ko bə Avropə İbemoni ıştən miyono həm ixtilorfon bə vucud vardey boyis bıə.harçənd Avropə İttifoğ de Amerkə bə ico 2014-ə soriku ki,Rusiyə Şərği Ukraynədə qıləy behron soxtey iyən Krımış bəştə ilhoğ kardey koyədə rolış hestebe,bə Rusiyə ələyh sanksiyaon tətbiğ kardeşe iyən ha sor ımi bə icro noydən.de ın holi Avropə İttifoği bənə Almaniyə iyən Fransə bıə kali dıjdə məmləkəton ım sanksiyaon məxsusən enerji baxşədə bıə sanksiyaon tətbiğ kardey dumo nin.ım sanksiyaon bə Avropə İttifoği məxsusən bə Almaniyə bıə mənfiyə təsiron oşkoə holətədə mışohidə kardey bedə.
Isət bə Rusiyə ələyh sanksiyaon dəvom doey iyən de bə Rusiyə rabitəon qıləy kullliyə çərçivədə dəvomi məsələ,bə Avropə İbemoni miyono ixtilof iyən dıtirəti boyis bıə.çın məmləkətonku bənə Yunanıston, Macarıston,Kipri bıə bəzi məmləkəton çı ğədimiku de Rusiyə hevujə surətədə ticori iyən ixtisodi əloğəonış movcud bıə,ısət ya ım sanksiyaon ləğv beıy və ya əy kam kardey dumon.əmmo bənə Polşə iyən Baltiki kəno məmləkəton ki,de Rusiyə kanə deşmınətiyonışon heste və Moskvə tərəfiku hejo qıləy təhlukə hiss kardedən,bə Rusiyə ələyh ım sanksiyaon dəvom doey tərəfdorin.bənə Almaniyə, Fransə, İtalyə iyən İspaniyə bıə əsliyə kişvəron harçənd bə Moskvə ələyh sanksiyaonədə de Amerkə bə ico həmkorətişon karde,əmmo əvon de Rusiyə dı tərəfinə rabitəon movcud bıey iyən enerji,ticori və ixtisodi baxşonədə həmkorəti kardey fikışon həm heste.
Avropə İbemonədə ısətnə vəzyətədə ki,de Rusiyə rabitəon barədə mıvofiğ iyən mıxolifə məmləkəton movcude,ısət har dıqlə tərəfon ıştə mınosibətonışon bəsə enerji məsələsə cəm kardə.de Rusiyə rabitə bərpo kardey umo bıə mıvofiğon de Moskva enerji sahədə ıştə əloğəon hevuj kardey iyən çı Rusiyə qazi bə Avropə İttifoği ixracat kardey fikədən.əmmo de Rusiyə rabitəon bırniye dumo bıə mələkəton çı Avropə İbemoni Rusiyə ğaziku bə şıkrə mandey vəy qətey tələb kardedən.liza bə ın ixtilofon dəvomi dığğət kardə holdədə,Avropə İttifoğ bə Rusiyə təklifış doə ki, Rusiyə qazi çı ukraynə royku bə Avropə ovoştıney barədə bıə mızokirəon de tobə oktyabrə manqi bə təxir eğando.
In mızokirəon çımi bənav bə proqrami əsos,avqustə manqədə bıənin be.Rusiyə Enerji Vəzərotxonə çandə kərə çı Ukraynə qazi xətton kanə bıey,boçəy inkişofiro çokə investitsiya nınoey iyən bın royədə bıə təhlukəonku xəbəş doə.Qazprom şirkət Rusiyə təbiiyi qazi de Ukraynə qazi xətti roy ,Yamal-Avropə, de Belarus –Nord strim-1 roy bə Avropə ovoştıneydə.de ın holi Rusiyə ıştə qazi bə Avropə ovoştıneyro,çı Ukraynə royku ozod bıeyro, Nordstrim-2 qazi xətti royış təklif doə.holı-hozırədə Rusiyə Qazprom şirkət de Baltik dıyo roy Nordstrim-2 projesə ko kardedə.
