134 qılə kişvər İroni ətomiyə təvafuğiku himoyəşon kardə.

77 nomo bıə qrup ıştə bəyoniyədə İroni ətomiyə təvafuğiku himoyəşon kardə ijən bə İroni zidd həmmə təsdiğ bıə sanksiyaon ləğv bey tələb kardən.

Bə İrna raporti əsos çı 77 nomo bıə qrupi xarıci vəziron İroni ətomiyə təvafuği bo dınyo bıhranon həl kardero qıləy çokə olqo iyən çı çand tərəfiyə votımon xoto qıləy muvəffəğə şivə hisobışon kardə.

Im təşkilatədə 134 qılə uzv bıə kişvəron İroni iğtisodi cəhətiku bə təcrid barədero ıştə muxalefəti elanışon kardə ijən vey rə həmmə təhrim və sanksiyaon ləğv bey tələb kardeşon.

İroniku çı İroni xarıci vəziri muavin Əbbas İrağçi ım iclosədə nıtğ kardə.

Həmçınin İ bıə Milləton Təşkilatədə İroni daimə nımoyəndə Ğolam Əli Xoşro zinə təkidış karde ki çı Amerkə prezident Donald Trampi cəncoliyə nıtği bəpeştə ısət vey kişvəron deştə vanq və oşkorə himoyəon ətomiyə təvafuği kamilən icra karde tələb kardedən.

Donald Tramp ıştə həminə nıtğədə İ bıə Milləton umumiyə iclosdə çand tərəfiyə təvafuğnoməon ləğv karde dəvomədə ətomiyə təvafuği vey dəhşətinə təvafuğ elanış kardə.

77 nomo bıə qrup 1964 minə sorədə de 77 qılə bə inkişofi tərf hərəkət əkə kişvəron İsveçədə təsis be.

Im qrupi tojə iclos Niyoyorkədə bərpo be.