Tehroni cumə nımoji xətib: İraği Kırdıston məntəğədə referendumi dəvoniye qıləy xəyonət be.

Tehroni cumə nımoji mıvəğğətə imom votışe: İraği Kırdıston məntəğə rəsmion bə İraği mərkəzi dıvlət və hamsuyə kişvəron tovsiyəon diğğət nıkarde holədə de referendumi dəvoniye vasitə vey yolə xəyonəti əncomışon doə.

Ayətullah Əhməd Xatəmi zinə bə dınyo kişvəron tərəfiku ım referendumi məhkum karde işorəş kardə və votışe: İraği Kırdıston məntəğədə referendumi nəticə bıvəcə təsiron vədə mandero çı İron, İrağ və Tırkiyə həmkari və həmfikion vey muhimmə iyən ciddiye.

Tehroni zinə ruji cumə nımoji mıvəğğətə imom Amerkə Las-Veqasədə terroristiyə huccum və beqınohə milləti ğətliami məhkumış kardə ijən əlovəş kardə: İron həmişə beqınohə cəmaəton ğətliami məhkum kardedə əmmo etığadışe ki Amerkə və ğərb həm bəbe dınyoədə məxsusən Yəmənədə beqınohə cəmaəti kışteyku dast peqətin.

Tehroni cumə nımoji xətib bə Amerkə tərəfiku kamilən çı ətomiyə təvafuği rioyət nıkarde işorəş kardə və votışe: ətomiyə təvafuği barədə ijən muzakirə karde imkonış ni və İroni millət və dıvlət hejo bə Amerkə xatircəm nin.

Ayətullah Əhməd Xatəmi həmçınin İronədə intizami ğıvvon haftə bino bey təbrik votışe və ım ğıvvə çı İroni millət və oromtəti hifz karde ijən de ğaçağçiyon mubarizə barde xoto İroni izzət və abro-həyo amil zınəş be.