Reqioni əmniyyəti və iğtisadi inkişafi ro muhummə sammit
Noyabrə manqi 1-minə ruji Tehronədə İroni İslamə Respublika, Rusiya və Az.R prezidenton vindemon dəvarde. Bo məntəğə xalğon əmniyyət və iğtisadi inkişafi muhummə əhmiyyətinə de ım tədbiri bahəm İslamə İnğilabi Rəhbər Ayətullah Seyid Əli Xamenei prezident Vladimir Putin, həmən İlham Əliyevış ğəbul karde.
De Əliyevi didorədə Ali Rəhbəri məxsusi ğeyd kardışe ki " bə İroni de Az.R arədə dustiəti munasibəton əleyh deşmenə ğuvvon hestin ki, çəvon məkr və xərobkarə hərəkəton vəy se ro de yolə əzmi çəmə məmləkəton arədə munasibət və rabiton həniən ğoym karde lozime". Rəhbəri həmən votəşe ki, " bə Əhli -beyt" (ə) məhəbbət İron və Azərbaycani xalqon muştərəkə mənəvi molyəte. Azərbaycanədə şion əzəmətinə əzadarə məclison ğədi zıne lozime. Çunki ım, şımə xalqi və məmləkəti barzə mənəviyyati inkişaf kardedə. Imsornə məhərrəmə manqi əzadarə mərasimon çe Azərbaycani xalqi ğoymə imoni qıley nışonə bıe."
De Putini vindemonədə Yolə Rəhbəri Suriyadə bə İroni de Rusiya bahəm fəaliyyəti barzə ğıymət doşe, ğeyd kardışe ki, Amerika, həmən çand qılə diqər devləton dastəq doə bə terrorçion əleyh mubarizədə həmkarəti muvəffəğiyyət, çəmə devləton arədə diqər sahonədən əlağon həniən ğoym karde zərurət və mumkunati nişon dodə.
Sammiti nəticon barədə tərəfon muştərəkə Bəyannamə ğəbul kardışone, votışone ki, ticarət və iğtisadi əlağon, "Şimal - Cənub" beynəlxalğə nəğliyyatə dəhlizi - şosse, osınə ro və aviasiya xətton inkişaf kardovnie sahədə həmkarəti həniən zumand bəkarden.
