Tehronədə islamiyə vəhdət beynəl xalğiyə iclos.

Tehronədə ımruj islamiyə vəhdət beynəl xalğiyə 31-nə iclos de Həsən Ruhani sohbəton bino be.

Bə İrna raporti əsos, ım iclos de 500 nəfər xarıci və daxıliyə mihmanon iştirok detos dekabri 7 dəvomış bəbe ijən çəy şoar vəhdət iyən islamiyə tojə təməddoni zəroriyat elan bıə.

Vey alimon və rəsmi şəxson dınyo muxtəlifə kişvəronku həminə iclosədə nıtğışon bəbe.

Çandə ixtisusiyə kamissiyaon əcumlə islam dınyo ısətnə vəziyət, mədəniyət əsoxtə alimon çoknə fəal karde, ğərbiyə təməddoni mığoyisədə islamiyə tojə təməddoni xususiyəton, çı islam dınyo ijən bəji əkə planon, mısılmonon miyono vəhdət və ıştəni bovə karde təsir ijən islamiyə tojə mədəniyəti bənə vəhdəti strateqiya zıne həm ğərore ki Tehronədə islamiyə vəhdət nomo bıə islosi kənoədə bərpo bıbu.

Imsor həmçınin mığovimət alimon beynəl xalğiyə i bemon, seydon beynəl xalğiyə icma iyən mısılmonə jenon beynəl xalğiyə icma icloson dəvoniye həm nəzər dəqətə bəy.

Zinə çı ımsornə sori vəhdət iclosi ğonəğon, İroni islamiyə inğilabi təsis əkə Həzrəte İmom Xomeyni(r) pokə hərəmədə de vılə dastə təğvim karde bə ə həzrəti məğom ehtırom kardeşone ki ıştən çı vəhdəti simvol be.

Bə Sınnion bovəon əsos zinə yəni Rəbiul-Əvələ manqi 12 çı islam dini yolə peyğombəri milad ruji ğeyd bıə be əmmo şiə rəvayətonədə ım mınosibət bo Rəbiul-Əvəli 17 minə ruji ğeyd bıəş

De İroni nizomi təsis əkə mərhum İmom Xomeyni(r) tədbiri bərobər ijən sınni və şiə mısılmonon miyono vəhdəti çımiku vey ziyod kardero Rəbiul-Əvələ manqi 12 detosə 17 minə ruj vəhdət nomo bıə haftə vıjinə bıə.