İronədə İmom Əli(ə)-i şəhodəti sorəqardış iyən 2-minnə Ğədr fəzilətinə şəvi mərosimon.
De dindaron və mısılmonon əzəmətinə iştiroki İroni həmməy məzhəbi vıronədə Ğədr fəzilətinə şəvonku 2-ə mənəviyə şəv ijən dınyo şiəyon 1-ə İmom Həzrəte Əli(ə)-i şəhodəti sorəqardışi matəmə mərosimon bərpo be.
Imruj, Hicri Ğəməri 1444-minnə sori mıburək rujə manqi 21-ə ruj de Hicri Şəmsi 1402 minnə sori Fərvərdinə manqi 23 minnə ruj iyən de Milodi 2023 minnə sori Aprelə manqi 12 minnə ruj, de şiəyon 1-minnə İmom Həzrəte İmom Əli(ə)-i şəhodəti sorqardışi bərobəre.
İmomət və viloyəti aşığon mubarəkə rujə manqi 21-ə şəvədə ironi mıxtəlif vıronədə bıə məçiton, təkiyəon, Huseyniyəon, ımomzodəon iyən məzhəbiyə vıronədə cəm bin və detosə sıb Kərimə Ğıroni təlavət kardışone, Coşəne kəbir nomo bıə dıvoşon hande və ilahi əzəmətinə nomoni zomzomə kardeşone tə de bə Həzrəte Əli(ə)-i təvəssul karde, Xıdovənde Xalıği rəhmət bəvon ğısmət bıbu.
Şiəyon 1-nə İmomi şəhodəti matəmə şəvədə Əhle beyte ismət və təharət(ə)-i məddahon həm zinə şəv Molaye Muttəğiyan Həzrəte Əli(ə)-i şəhodəti həxədə nohə iyən mərsiyə handışone.
Rujə manqi 19 minə səhərədə Xəvaric qrupiku İbne Mulcəm Muradi qıle holədə ki İmom Əli(ə) Kufə məçitədə nımoj vote holədə be dıştə zəhrinə şımşi ə Həzrəti mıborəkə sə anədə de şiddəti zəxminış kardə ki oxoy sə şiəyon i minə İmom 2 ruj bəpeştə yəni rəməzanə manqi 21 kədə şəhid be.
İroni mısılmonə millət məxsusən Məşhədədə bıə İmon Reza(ə), Ğomədə bıə Xanım Məsume(s) pokə hərəmon həmçınin Şirzədə bıə Əhməd İbne Musə Şahe Çırağ(ə) hərəmonədə cəm bən və de Kərimə Ğıroni bə sə noe iyən məxsusə dıvon hane ujnən de Xıdovənde xalıği və Əmirəl-Mumınin(ə) əhd bastışone.
Bə rəvayəton əsos mubarək rujə manqi 19, 21 və 23-nə şəvon həmonə Ğədrə şəvonku iborəte ki mısılmonon de şəvədə oğo mande, Ğıroni bə sə noe, dıvo hande, Coşən Kəbir nomo məxsusə dıvo ğiroət karde deştə Pərvərdıqori raz-niyaz və mınocat karde məşğul bıdən.
Ğədrə şəv qıləy şəve ki 1 sori mıddətədə çəy vədə fəzilətinə şəv peydo nibəbe, anədə ki ım şəvədə ibodət karde bənə 1000 manqədə bıə ibodət ğeyd bıə və həmonə şəvədə insonii təğdir iyən tale mıəyyən bəbe.
İroni Tolışi Rədio tərəfo şiəyon 1-nə İmomi iyən dınyo ədolət tələbon rəhbər Həzrəte Əli(ə)-i şəhodəti sorəqardışi bə şımə səbəsəlomətəti ərz kardıdəm, şımə zinə Ğədrə şəvi ibodəton de Əmirəl Muminin(ə)-i inayəti xıdo dərqahədə ğəbul bıbu.
