Tırkiyədə 33 nəfər bə DAEŞədə uzv bey ittihomi xoto dastqir bıən
Cımə sıbədə Tırkiyə əmniyyəti ğıvvon 33 nəfər ım kişvərədə xarıci təbəə ki Mersin və İstanbuli ostanonədə bin, bə DAEŞ terroristiyə qədə qrupon uzv bey xoto, dastqir kardışone.
Çımiku bənav yəni Tirə manqi 2minnə rujədə həm Tırkiyə İstanbulədə əmniyyəti ğıvvon qıləy şəxs dastqir kardışone ki de diğğət bə çəy kə peydo bıə çiyon bə nəzə rəsedə ki terroristiyə yolə əməliyoti əncom doeyro hozzo bəbe.
Həmçınin Xordadə manqi 3minnə rujədə həm Tırkiyə əmniyyəti mənbəon xəbəş do ki 12 nəfər DAEŞ-i terrorist qrupi dastqirış kardə ki əcumlə İstanbul, Ğoniyə və Antaliya ostanonədə 3 nəfər ım qədə qrupon rəhbəronku be.
Bə Anatoli aqentiyəti raporti əsos, Mersin ostanədə de terroriston mubarizə bardey ğıvvon, 6 nəfəri dastqir kardışone ki ehtımol şedə ki DAEŞ-i qədə qrupon uzvonku bıbun, əvon həmçınin Tırkiyə xarıcədə bə de DAEŞ-i terroriston rabitə bərğəror kardey iyən silohinə hərəkəton əncom doey mıttəhəmin.
Im raport əlovəş kardə: əmmo İstanbulədə ım əməliyot 3 qılə muxtəlifə məntəğəonədə əncom bıə və 28 nəfər xarıci təbəə dastqir bıən.
