Məhərrəm,Huseyni manq--10
Məhərrəm,Huseyni manq--10
İmom Huseyni(ə) Aşurə daston dərsonku bıə muhimmə nuktə,həxı de botıli zıney,ın dıqlə co kardey iyən həxə royədə tosə ıştə coni oxonə nəfəsi hərəkət kardeye.dışmen deməkə ki,de oşkoə formə bə həxı ələyh mıborizə bardedə,qahi zəmon ıştə çe həxı ğıyofədə nışon doydə və həxı botıl cilvə doydə ki,çimi bə qıləy ruşinəti niyoz və ehtiyociş hesteşe.çıro ki,de Əmirəl-Muminin Əli(ə) təbiri:”ehyanə həx xolisə tərzədə nışon doey bıbu,ikəs çəy ğəbulədə şəkk nıəkardi və əqər botıl xolisə şikilədə nışon doey bıəbe,ikəs çəy rədd kardeyədə tərəddud nıəkardi”.
Xıdovənde-Xalığ R`ədi mıborəkə surə 17-ə şərifə ayədə bo həxı iyən botıli misol jeydə və həxı bə zulolə ovi təşbih kardeydə ki,hejo foydənin iyən səmərənine və botıli bə ovi peyo bıə ka təşbih kardedə.həx təvazukor,həmçinin kamə sədo kardedə,əməli əhle,purmehtəvo iyən vəznış sanqine iyən de Məcidə-Ğıroni təbiri hejo foydənin iyən səmərənine.həx bənə zulolə oviye ki,bə jimon iyən həyoti səbəb beydə.əmmo botıl befoydə iyən bihudəy.bənə ovi peyo bıə kay ki, hiçvaxti ikəsi sirov nibəkarde iyən deçəy vositə qıləy do nipebərəse.həmçinin bənə filiz iyən metalon ov kardə kurəonədə bıə ka zohir beydə.İmom Huseyn(ə) çe həxı barizə çehrə və simay.qıləy şəxsiyyət ki,ıştə umriku şəş sorış ıştə cədd pəyğombəri(s) kəno dəvordınışe iyən çe vəhyi məktəbədə perəse,yol be və bə həmməysə barzə əxloği iyən insoni xısləton soyb be.Əv,bo zəmini dimsiə bıə qırd insonon çe Xıdo huccət be.əmmo çe mıoviyə noxələfə fərzənd yəzid,qıləy noloyığə unsur iyən meymunboz be ki,çəy inhirofoton İslomə dinış de xətər iyən təhlukə dimbədimış kardəbe.çın dıqlə mıborizədə İmom Huseyni(ə) ğıyom bənə qıləy ovəynə çe curbəcurə şəxson vədə ğərolış qəte və çəvon vucudi punhonə ğatış bəçəvon ıştən iyən bə torıxi nışonış doe.dınyo məhəbbət çın fərdon bədbəxtəti həmməysə muhimmə amil be.şəytoni çe dini iyən hissi bəhonəon bəçəvon qəvon noşe və əvonış çe həxı məsir iyən royədə bə şəkkiş dıço karde....
