Bə Həzrəte Zeynəbi(s) vilodəti məxsus
Bə Həzrəte Zeynəbi(s) vilodəti məxsus
Həzrəte Zeynəb(s)deştə xıyzoni dılədə vində məxsusə tərbiyə iyən təlimi təvəssıti,bə qıləy ağılmand iyən mudrikə kinə təbdil bıəbe.ə həzrət hırdənəti iyən nevcıvonəti devronədə elmi məclisonədə şirkət və iştirok kardedəbe iyən de mıxtəlifə elmon omutey min cumlə Ğıroni təfsir iyən İslomi fiğhi elmon omutey koy məşğul beydəbe və bə ın elmon qıləy məxsusə rəğbət nışon doydəbe.ın təlimon bəy koməqış karde ta ayəndədə bə qıləy təsirin iyən barzə şəxsiyyəti təbdil bıbu.qıləy şəxsiyyət ki,nəyin ki,İslomi torıxədə bəlkəm qırd dınyoədə dayima əy bənə qıləy istisnoyiyə jeni unvoni zikr kardedən.ğasbu həm çe həzrəte Zeynəbi(s) həmməysə barz iyən muhimmə xıslət ki,əy çe diqər kəsonku co kardedə,çə həzrəti şucoət iyən fədokorəti be.ə həzrət çe İslomi torıxi vey həssosə devrəonku qıləyniyədə yəni Hicri-Ğəməri 61-ə sori Kərbəlo vağiyədə qıləy əsosə rolış ifo kardə.bın telə hodisədə Həzrəte Zeynəb(s) bəştə bıvə həzrəte İmom Huseyni(ə),bəştə xıyzoni veyə uzvon iyən bəştə co əzizon şəhodəti şoyd bıə.əmmo Əv,de qıləy mislış nıbə şucoəti ıştə azizə bıvə Həzrəte İmom Huseyni(ə) şəhodəti bəpeşt,çe əmandə odəmon iyən hırdənon yolyəti məsuliyyətış bəştə ehdəş peqəte və de qırd zumandəti əvonış həmmə çe dışmeni təərruz iyən təcavuzi mığobilədə mıdofiyə iyən himoyəş karde.
Həzrəte Zeynəb(s) Aşurə bəpeşt bıə rujonədə qıləy holədə ki,Əhli-Beyt(ə) bə əsorət peqətə bıəbin,Kufə iyən Şami şəhronədə deştə təsirinə sıxanon çe Kərbəlo macəro iyən Aşurə ğıyomi həyğətonış bə qırd mərdumi quşon rosneşe.Əv,çə zəmoni sıtəmkorə hakim bıə yəzidi vədə de şucoəti mande və çe həx iyən ədolətiku mıdofiyəş karde.çə həzrəti ın sıxanonon nəyinki,fəğət bə mərdumi oğoəti boyis be,bəlkəm çe Aşurə ğıyomi mesajonış bo omə ayəndə nəsli həm bəyjiş oqəte.Həzrəte Zeynəb(s) deştə ıqrd ın hərəkəton nışonış doe ki,çokonə çe zolımi vədə mandey bəbe və insoni iyən əxloği erjon mıdofiyə kardey bəbe.Aşurə ğıyomi bəpeşt Həzrəte Zeynəb(s) de əmandə kəson bə ico bə əsoərt bardey bin iyən bə Kufə iyən Şami şəhron bardey bin.bın şəhronədə ə həzrət bo Aşurə ğıyomi mesajonış rosnero çe har qıləy fırsətikuş oko doe.Əv,deştə təsirin iyən ğoymə xutbəon milləti bə oğoəti iyən aqahəti səmt vanq jeydəbe və çe hakimon zılm iyən sıtəmon ifşo kardedəbe.Həzrəte Zeynəbi(s)ın sıxanon boyis be ki,çe Aşurə iyən İmom Huseyni(ə) ğıyomi mesajon dayimi surətədə torıxədə bəyji bımando.Həzrəte Zeynəb(s) ıştə jimoni dırozi bo ımrujnə camiyə həm muhimmə mesajonış baği haştəşe.Əv,bəmə omuteşe ki,çe zılm iyən beədoləti vədə bəpe sukut kardey nıbu və de imon iyən mığoviməti bəpe həx iyən ədolət mıdofiyə kardey bıbu....
