Nəhcul-Bəlağə

Nəhcul-Bəlağə

Əmirəl-Muminin İmom Əli(ə) Nəhcul-Bəlağə 139-ə hikmətədə de insoni niyozon rabitədə bə İlahi mıstəğim iyən sərostə koməqon işorə kardedə və hamyedə:Tənzilu...(İlahi) koməq çəy hacət iyən niyozi əndozədə nozil bəbe”.

Əmirəl-Muminini(ə) ın sıxan ıştədə dıqlə pəyğom iyən mesaji ehtivo kardedə:əvvəl ıme ki, çanədə çe insoni xarc ziyod beydə,təbiyyə formədə çəy səy və cəhdon həm vey bəbe.ikəs ki, veyə cəhdon əncom bıdo,Xıdovənd həm bəy veyə mədəd və koməq bəkarde.de qıləy co iborəti Xıdovənd bəy lozım bıə koməqon bəkarde.

Dıminə mesaj ıme ki,Xıdovənd bə fərdon ruzi rosneydə ki,boştə jimoni veyə xarcon kardedən və çəvon dast iyən dılon bo bə niyozmandon baxşeşiro,xeyə koon əncom doeyro iyən bo mehmon ğəbul kardero oje.əve,Xıdovənd bəvon hevujə rızğo-ruzi rosneydə.ın həkimonə kəlom həyğətə də piyedəşe ki,təkid bıko ki,ım Əbaxşə Xıdoye ki,ruzi rosneydə.çən,bəpe qıləy çiyku vohimə kardey lozım ni.

Imruj bəziyon de ziyodə məxaric iyən həzinə bəhonə,izdivoc iyən xıyzon təşkil doey koyku sərfı-nəzə kardedən və ın ko əncom doydənin.qıləy holədə ki,Nuri mıborəkə surə 32-ə şərifə ayədə Xıdovənde-Aləm həmmə insonon bə izdivoci səmt dəvət kardə holədə,ımi həm əlovə kardedə: ”İn yəkunu fuğəra...ehyanə əvon təyə dastin,Xıdo əvoni ıştə fəzliku beniyoz bəkarde”,..

Cohiliyyəti əsr və zəmonədə i iddiə və i hissə fərdon çe fəğrəti tarsiku ıştə fərzəndon kıştedəbin iyən Xıdovəndi bəvon xitobən jıqo hamyəşe:”Vəla təğtulu əvladəkum...və ıştə fərzəndon bə fəğrəti tarsiku bə ğətl mərosnənən.əmə bəvon iyən bəşımə ruzi doydəmon”.ımruj həm fərdon hestin ki,ixtisodi məsələon bo fərzəndi soyb nıbey və ya bo kamə fərzəndi soyb beyro bəhonə vardedən.və holın ki,Xıdovənd ıştən çe həmmə insonon ruziş zəmonət kardə və bəy zamine.

Kali qıləyniyon həm ıştə molonku kamə hissə bə cokəson baxş iyən infoğ kardedən.qıləy holədə ki,Xıdovənd bəçəmə həmməş jıqo hamyə:infoğ bıkənən iyən fəğrətiku mətarsənən ki,mı Xıdo əy cubron bəkardem və çəy əvəzi bebəşem.çən,hakəs ki,de kəroməti iyən de ojə dast və dıli jimon bıko,Xıdovənd həm çəy ruzi ziyod bəkarde.çoko ki,Xıdo-Rəsliku(s) nəğl bıə ki,ə həzrəti jıqoş hamyə:”Mən vəssiə vusiyə ələyh...hakəs ıştə infoği dovnə və əhotə hevuj bıko,Xıdovənd(həm) çəy ruzi hevuj bəkarde və har qıləy zəmon çe insoni xıyzoni fərdon vey bıbu,ruzi həm vey ziyod bəbe”...