Nəhcul-Bəlağə

Nəhcul-Bəlağə

Əmirəl-Muminin İmom Əli(ə) Nəhcul-Bəlağə 140-ə hikmətədə çəmə dığğəti bə jimoni xarcon iyən bəroməon miyono qıləy təraz iyən balansi icod kardey iyən plan kəşey səmt cəlb kardedə və hamyedə:”Ma alə məniqtəsədə”ikəs ki,xarc kardeyədə miyonə ro bışo,hiçvaxti fəğır nibəbe”.

Imruj isbot bıə ki,ehyanə çı isrof iyən təbziriku pərhiz kardey bıbu iyən bo sərmoyəon xarci koyədə bə ekonomiyə və isrofçoəti nıkardey rioyət kardey bıko və miyonə ro bışo,çe xıyzonon və ya hətto çe camiyə ziyodə muşkiloton həll bəbe.problem,qıləy zəmon bo qıləy fərd ya camiyə pəydo beydə ki,bo xarcon iyən bo niyozon qıləy dəğiğə hisob nəzədə qətey nıbu iyən fərdon behisob iyən bekitob çiçışon heste xarc bıkon.bın surətədə beşək,qıləy zəmon bome bərəse ki, fərd ya camiyə bə fəğrəti ğərğ bəbe.

Əmirəl-Muminin Həzrət Əliku(ə)omə rəsə coqlə hədisədə jıqo hamyedə:”ikəs ki,miyonə ro şey ıştə şivə ğərol bıdo,çəy sərvət iyən beniyozəti dəvomış bəbe iyən çe etıdoli metod çəy jimoni muşkiloton cubron (və kompensasiyə) bəkarde.

İslomi mənbəonədə həm həmişə ifrot iyən təfrıt ki,çe ədolət iyən miyonə ro mığobilədə ğərolış qətə,qıləy mızəmmət bıə və sə-sıxan kardə bıə vıronkuye iyən ın mızəmmət bə qıləy məxsusə zəmoni ayid ni.Kərimə-Ğıron Ərafi mıborəkə surə 31-ə şərifə ayədə jıqo hamyedə:”Vəla tusrifu...Və isrof məkənən ki,Xıdovənd isrofəkəyonış piyedəni...

Həlbəttə,miyonə ro nəyinki,ixtisodi iyən moliyyə məsələonədə,bəlkəm həmmə koonədə bə xoş omə koye.hətto tevsiyə və sıfarış bıə ki,muminon ibodəti koyədə ki,bə Xıdovəndi ğurbi vəsilə iyən vositəy,miyonə ro ıştə dasto nıdon.”Usuli Kafi” kitobədə ki,çe Şiyə hədisi kitobon həmməysə muhimm iyən metəbərə kitobe,çəy ənıvışt Siğətul-İslom Kuleyni Razi “İbodətədə miyonə ro” babədə çe Xıdo-Rəsuliku(s) qıləy hədisədə nəğl bıə ki,ə həzrət jıqo hamyedə:”İnnə hazəddinu....bərosti ın ayin və din bə hisobi əsos iyən mətine.bın məsir iyən royədə de mudorə hərəkət bıkənən iyən Xıdo bandəon bə ziyodə ibodəti məcbur məkənən ki,bənə dəmandə suvori bəbe ki,əv,nə bəştə məğsədi rəsə və nə ıştə mərkəbış və ıştə penıştə çiş solim haştə”....