Moskvadə tolışon Nəvuzə şodmonə tədbirədə iştirak bəkarden
Nəvuzə idi ğeyd karde insonə cəmiyyəti ən ğədimə adətonədey. "Badkubeh.com" sayt həx nıvıştedə ki, tarixi dırozi vey reqressiv ğıvvon bıən ki, ım idi ləğv, çey mahiyyəti əvəz, əhəmiyyəti bə kam karde cəhdədə bıən. Əmo bəştə məğsədi nail bıe zınənin.
Ali Rəhbər Ayətullah Seyid Əil Xamenei de Nəvuzə idi munasibəti həmə İroni xəlğ, həmən ım idi ğeyd kardə diqər cəmiyyəti odəmon təbrik kardəşe. İroni İslamə Respublika prezident Həsən Ruhaniən bə reqioni 9 qılə məmləkəti rəhbəron ki, Nəvuzə idi ğeyd kardedən, təbriknamə vığandəşe, bə çəvon ictimaiyyəti muvəffəğiyyətinə və xoşbəxtə sor orzu kardəşe.
Imsor Rusiya prezident Vladimir Putiniən ım idi ğeyd kardə Rusiya şəhrıvandonış təbrik karde.
Tolışə xalqi numayəndonən dınyo har vırədə bedən-bıbon, ıştə ım qiramiə idi de təntənə dəvunidən, dee çe ğədimə əcdadonku omə adət - ənənon sənibəton tojə kardedən, bəştə nuəperəsə hırdənon ım curə pərvəreş dodən. Tolışə Sipirişon Şura de ım munasibəti bə tolıə xəlği muraciət vığandışe, bə çey Nuə sori, Nəvuzə idi, Kulə şəvi təbrik votışe.
Moskva şəhəri bələdiyyə marti 25-minə ruji bo Nəvuzi ğeyd kardə milləti numayəndon qıley şodmonə mərasim təşkil kardəşe. "Tolışə diaspora" və "Tolışə Milliə-Mədəniə Muxtariyyət" təşkilaton rəhbəriyyəti jitono Moskva tolışon şəhəri ictimaiyyəti vədə tolışə musiği, mətbəx, etnoqrafik xususiyyəton numayiş bəkarden. Tolışə televiziya ım tədbiri barədə hartərəfinə bərnamə bəştə təmoşoqəron təğdim karde nəzərədə qətəşe.
