Şəki cumə məçitədə hakim Əliyevon ailə təbliğ kardedən

Şəki şəhəri dindaron bə Meydan TV qıley məktub vığandəşone. Şikayət kardəşone ki, çe ımsornə fevralə manqiku şəhəri cumə məciti xutbonədə hakim ailə təbliğ kardedən.

Məçiti Muşfiğ nominə imom har xutbə orəxədə Əliyevon ailə tarif kardedə. Orəxnə xutbədə İslami bə zənənon doə ğıyməti həxədə qəp jəşe, Mehriban Əliyevaş tarif kardə. Dindaron ğeyd kardedən ki, əvon bə məçit dini kəlomon məse ro, şedən. Bə TAP iclas şedənin ki, bə hokuməti təbliğati quş bıdon.

Meydan TV de ım məsələ əlağədar bə Ğəfğazi Mısılmonon idarə muraciət kardəşe. Əyo bə muxbiri votəşone ki, bı barədə jı çi vote ro səlahiyyətşon ni. Şəki İcra Hakimiyyətədən cəvob doəşone ki, çe ım faktiku bexəbərin.

Apreli 5-ədə 3 nəfər hicabi məhbus - Ağadadaşov Tərlan, Allahverdiyev Revşən və Hətəmov İlhami 5 sor 6 manqnə zindonə cəzo muddət bə orəx rəsə. Əvonşon çe zindoniku azad kardə.  2012-minə sori oktyabri 5-ədə bə hicabi ğədəğən karde etirazə aksiyadə iştirak karde səbəbiku bə zindon dənoə dini məhbusonədə ısət 3 kəsən - Kərimov Davud, Şirəliyev Telman və Rzayev Elşad 6 manqi bədiqə bə azadi beşəninin.

Nardarani faciə məhbuson - Elçin Ğasımov və çey 11 nəfər həmməsləkon Apellyasiya məhkəmə bə orəx rəsə. Hakimi çe vəkilon və məhbuson votə fakton hiç qılə bə nəzərış sə ni, navonə məhkəmə hokum ğüvvədə oqətəşe. Məhbuson bə hakimi ım ğərari de "Əmə zulm kardənimon, bə zulmi qiy kəc nibəkardemon" şuari cəvob doəşone.

Vəkil Bəhruz Bayramov zindonxonədə de AİP sədr Mevsum Səmədovi didor kardəşe. Ey bə "İslamın səsi" sayti bı barədə məlimat doəşe, votəşe ki, Səmədovi əhvol - ruhiyyə barze, diən bıbo, de tojə, Şəmsi sori munasibəti Azərbaycani xalq təbrik, bey muvəffəğiyyəton orzu kardışe.