Tanğəbıni həll nıbə mışğılon

Lankoni rayoni Tanqəbın nomədə qıley di hestışe. Respublika əhəmiyyətinə Lankon - Lik maqisrtal şosse roy səpe vırə qətedə.

Im diy sakinon ıştə məşəğğətinə jimoni, diy çand soron dırozi həll nıbə problemon barədə bə Meydan TV qəp jəşone. Votəşone ki, diədə bekorəti, qazi, məktəb və tibbi məntəğə nıbe, roon bərbodə vəziyyət diy əhali xeyli hissə əsasən bə Rusiya kuc karde məcbur kardəşe. Plan heste ki, bə nezə 2 qılə di ğaz obəkırnen. Əmo ətrofi 5 qılə di Tanqəbınən daxil bə ım layihə daxil kardəşon ni. Hərçənd ki, bə Lik şə maqistralə ğazə lulə çe Tanqəbıni miyonəku dəvardedə. Əqər diy kəon de ğazi təchiz kardə bıbo, ım, əhali quzərani xeyli bə səhmon ebəğande. Çunki tosə ısət zımıstonədə mənzilon de ezımə piçi ətosbonin. İsət vişəonən həni orəxən. Kəy tosbonie ro ezım tədaruk karde mumkun bedəni.

Bə Lankoni İcra hakimiyyəti kardə şikayəton nəticə dodəni. İcra sərdar votedə ki, ım diy əhali kam bıe səbəbiku əyo məktəb, tibbə məntəğə onoe mumkun ni. Diy sakin Həğiğət Babayeva votedə ki, diədə 250 nəfər sakin heste. Rayoni vəzifədaron ım problemon həll nıkarde səbəbiku əhali ıştə səy peqətedə kuç kardedə bə co məholon. Nafko diədə əhali miğdar xeyli vey bıe.  

Vazəru çe diy miyoniku dəvardedə. Penə sədə çe kaqə ferma həmə zibil, lırdov və kimyəvi zəhəron bə ru səbəro doəşone.  Isət ruy vardə buəvulə dastədə diy camaat çe təmizə həvokuən məhrum bıə.

Diədə Vazəru səpe ğədimə devriku mandə ğoymə pard hestbıe. Ruy miyonədə qıley sığə karxonə onoşone, bino kardışone çəvrey sığon hore. Nəticədə həmonə pard rıjie, bo əhali çe ruyku ovaşte bə qıley məşəğğət peqarde. Həmən ovayz omeədə bino kardışe ətrofi munbitə zəminon şışte - barde. Hokumət  ım ekoloji fəlakəti vəy se roən hiç qıley tədbir vindedəni.

Əlavən vote lozime ki, jıqo problemon Az.R dion əksəriyyətədə heste. Imən çəvron əhali bə şəhər kuç, və ya bə xaric muhacirət karde məcburiyyətədə oqətedə.