Az.R-ədə de dini azadion əlağədar problemon

Az.R bə Dini təşkilaton dair Devlətə Komitə sədr Mubariz Ğurbanlı votedə ki, Respublika hokuməti tərəfo bə həmə dini konfessiyaon tam tolerantə munasibət mevcude. Əmo xeyli fakton hestin ki, çey ım votəyon təkzib kardedə.

Sərost 1 sor çimi bə nav "Azinform.az" sayti xəbə doəşbe ki, Şəki şəhərədə huğuğə mudafiəçi "Bə əğılə kəon tənəvəc" nominə Ğeyri Hokumətə Təşkilati səvon Sahib Teymurov çe ım rayoni Polisə Şebə tərəfo bə cinayətə məsuliyyət cəlb bıə. Bə səbəb ki ey de xristianon Pasxa idi munasibəti Şəki şəhəri Əğılə kəy hırdənon bə Albanə kilsə, Şəki xani Saray və Əyləncə Mərkəz bə nəve bardəşe. Sahib Teymurov ıştən xristian mənşəninə şəhrıvande.

"Qafqazinfo" sayti Boku şəhəri Yevangelist - Luteranə dini İcma uzvon bə Dini təşkilaton dair Devlətə Komitə sədr Mubariz Ğurbanlı ıştə vəzifə deni icra nıkarde barədə bə məhkəmə  muraciət karde həxədə xəbə bəştə əhandon rosniəşe. Boku İnzibati Məhkəmə ım iddia rədd kardəşe, ısət həmonə icma uzvon bə Apellyasiya məhkəmə şikat kardəşone.

Amerika Devlətə Departamenti 2017-minə sori dınyoədə bə dini azadion vəziyyəti dair ıştə hesabat pevolo kardəşe. Bə hesabatədə ğeyd kardedən ki, Az.R -ədə 80 nəfər dini məhbus heste, bə dini fəalon fiziki təzyiğ və işqəncon dodən, məciton dəbastedən, dini ədəbiyyaton həvate səpe məhdudiyyəton noəşone. Dini icmaon çe devlətə ğeydiyyato dəvarde roədə de xeyli mışğılon vəbəvə mandedən.