Tolışə məntəğonədə zəmin vajiə hadison

Az.R ekoloji sistemədə vəziyyət şe-şe qıvonin bedə. Diə məkəmon ki, de ım məsələ bənə Ekologiya və Təbii sərvəton Vəzarəti qıley zumandə devlətə təsisat məşğul bedə, əmo məmləkətədə bə təbiəti ziyankarə hərəkəton vəy se mumkun bedəni.

"Sputnik.az" xəbə dodə ki, bə ım vəzarəti dair çe Lankoni şəhrestaniku  vişə massivon ance barədə şikayət vığandəşonebən. Ətrofə Muhiti Muhafizə Departamenti həmkaron ım fakt otırniəşone, məlum bıə ki, Haftoni vişə muhafizə məntəğə əraziədə 229 qılə do bıriəşone, bə ətrof muhiti xeyli ziyan jəşone.

"Press.az" bə "Trend" sayti istinadən Tolışə zonədə zəmin vajie nəticədə xeyli roon bə bevəcə vəziyyət eqıne həxədə nıvıştəşe. Hostoro rayoni Değədi -Pəlikeş şosse ro 5, 7, 8, 10 - minə kilometronədə vajie nəticədə tək bə əməl omə, kali vıronış epıkiə. Jıqo vəziyyət Kujobə, Mıtoliyatəğ dion əraziədən muşahidə bedə.

 Lankon - Lik avtomobilə roy 17-19, 27-29, 45-47-minə kilometronədə voə-voşi nəticədə vajiə hadison dinamika həniən ziyod bıə. Jıqo hadisə Lik - Ğosməliyon - Kələvəz şosse roy 10-minə kilometrədən təkrar bıə.

Lankoni Tukəvilə - Dıryon - Qəqıron roy 12-minə km -ədə çand vırədə ro epıkiə, xeyli təkon bə əməl omə. Qəqıroni diədə kanə vajiə sahonədə tojə fırsiə vıron bə meydon beşən.

Im çurə hadison Masəlu və Cəlilabad rayononədən vağeə bıən.

Çımon əsasə səbəbən bımədəy ki, hokuməti səhlənkar munasibəti nəticədə Tolışə vişon xeyli hissə məhv kardışone. Ocizanə hole ki, jiqo səhv siyasətiku nəticə bekarde əvəzi, vişon ance, təbiəti məhv kardə siyasət dəvom kardedə, bənə ım siyasəti nəticə Tolışə məntəğonədə zəmini vajiə və fırsiə hadisonən şe-şe ziyod bedən.