“Tolışon sədo” rujnomə tojə numrə çe çapo beşə

“Tolışon sədo” rujnomə ımsornə 11-minə numrə nəşr bıə.

İm rujnomə kollektiv və çey sər redaktor Rafiğ Cəlilov bə tolışə xalği ım əsasinə mətbuə orğani ənənə cadiğ mandən. Ümumən ıştə fəaliyyəti 7 sori dırozi 112 numrə vadoəşone, həmişə iqlə  tolışə ədəbiyyati nümunon bə əhandon edaştəşon ni, həmən tolışə ədəbiə zıvoni problemon müzakirə kardəşone, çəmə xalqi ictimai siyasiə jimoni mışğılon bə ictimaiyyəti nəzə rosniəşone.  

İm numrə sıftənə səhifədə Atabala Babayevi kali zombiə tolışon bəştə inə zıvoni neqativə münasibət, bı zıvonədə qəp je nıpie həxədə ıştə müşahidon “Kəy kələ” nominə nıvıştəyədə de əhandon baxş kardəşe.

Rafiğ Cəlilov ıştə sər redaktori səhifə bə tolışi jimoni aktualə məsəlon həsr kardəşe. Bı səhifədə əv tolışə mətbəxi ləzizə hardəy “Ləvənqi” bə tırkə mətbəxi aid karde cəhdon ıştə tənğidiə fikron nıvıştəşe. Həmən tolışə ədəbiə zıvonədə məsdəri forma nıvıştemonə ğaydə bə əhandon muzakirə bekardəşe.

Rujnomə 3-minə səhifə bə Ğərəboği canqi veteran polkovnik Mikayıl Hacıyevi xatiron həsr bıə. Hacıyevi bı həxədə ıştə kitobədə 1992-93-minə soron hərbiə əməliyyatonədə vağeə bıə xəyanətonku nıvıştəşe.

Əhandon Tolışə milləti etnoqrafə alim Nəriman Ağazadə bə Tolışıstoni Likı məholi etnoqrafik xüsusiyyəton dair müfəssəl tədğiğatə məğalə dəvomi rujnomə 6-minə səhfədə hande bəzınen.

Rujnomə əhandon çe Camal Lələzoə, İlyasi Habil`i, Allahverdi Bayrami hekayon, Cabbar Əli novellaon, Samir İmanov`i oçerk, Mirfayaz Likməkani, Baladdin Veşo, Yusif Rəhimi, Məxsun Perzə, Tofiğ Nicat`i, Kərbəlayi Sadığ`i şeeron, Rəfael Ağayev`i qıley lətifən hande bəzınen.

Rujnomə elektron variant çe sərredaktori “rafiqibloq” saytədə dərc bıə.