“Tolışon sədo” rujnomə tojə numrə çapo beşə
Dəvardə rujonədə "Tolışon Sədo" rujnomə ımsornə iminə numrə çapo beşe. Bı numrədə xeyli marağinə nıvıştəyon hestin ki, ısət çəvon kutohə xulasə bəşmə nəzə bərosnemon.
Sıftənə səhifədə Tolışıstoni Liki şəhrestanədə tolışə vişon tuməbıri həxədə Elxan Mirzəyevi nıvıştə "Mardə Vişə" məğalədə məlumat se bəzneyon. Muəllif ğeyd kardedə ki, ey Tolışə vişon tuməbıri həxədə bə həmmə devlətə orqanon muraciət kardəşe, əmo həmonə orqanon Tolışə vişon məhvi navi qətero hiç çi kardedənin.
Rujnomə dıminə səhifədə Mikayıl Hacıyevi "Nodonəti, ya xəyonət" kitobi orəxnə vəslə bə handəkəson edəştə bıə. Hejo həminə səhifədə çe şair Məxsun Perzə "Xıdo" poema sıftənə ğism dərc bıə.
Seminə səhifə çı sərredaktor Rafiğ Cəlilovi ənənəvi tribunay ki, əv əyo bə Tolışıston ıştə dekabrə səfəriku, Tolışə vişəon ance, Azərbaycani rəsmyon elan kardə 225 məktəbon ki, de hokuməti votəy, quya tolışi zıvonədə dərs dəvonidən, iyən inə zıvonədə tədris səy həzzi barədə nıvıştəşe. Hejo həmonə səhifədə şair-ənıvışt İlyasi Habil`i qıley hekoyən dərc bıə.
Çominə səhifədə İroni Tolışə şair Fərəməz Məsruri ofəyəvonətiku, məxsusən çəy "Hındılə peşt" poema həxədə İronıjə kulturoloq tolışə navğədəmə ruşinəfikir Yasər Kərəmzodə təhliliə məğalə bə əhandon təğdim bıə.
Pencminə səhifədə ədib Camal Lələzoə "Prezidenti ğəror" nominə hekoyə doə bə ki, əyo çe xəlği çətinə vəziyyətiku bəhs bedə.
Peşonə səhifonədə çe etnoqraf alim Nəriman Ağazodə Liki tolışon mənəviə mədəniyyəti tədğiğati idomə, filoloq alim Allahverdi Bayrami qıley hekoyə idomə, Mehdibəy Səfərovi bə tolışə dion təy be, tolışon ıştə vətəni tərq karde, bə Boku kuç kardeku bəhs kardə "Basdari musibət" hekoyə iminə vəslə, Samir İmanovi "25 dəyğəynə ro" nominə publisistikə nıvıştəy oxminə vəslə çap bıə. Rujnomədə həmən çı Xanəli Tolış`i, Cavanşır Pensəj`i, Yadulla Sayad`i, Aytən Eyvazon`i, Hidayəti Elmas`i şeironən hande bəzıneyon.
Xosə radio əməson, "Tolışon Sədo" həm ım numrə, həmən sıftənə numron elektron variant “Rafiqibloq” saytədə hande bəzneyon.
