“Tolışon sədo” rujnomə 4-minə numrə çe çapo beşə

“Tolışon sədo” rujnomə aprelə manqi numrə çe çapo beşə. Isət çey kırtə xulasə bəşmə nəzə edaştedəmon.

Rujnomə sıftənə səhifədə çe Tolışi sandinə şair Əli Nasiri təvəlludi 64-minə sorəqardışı həxədə Respublika Tolışi Mədəniyyətə Mərkəzi sədr Rafiğ Cəlilovi təbrik doə bə. Iştə təbrikədə Rafiği ğeyd kardəşe ki, Əli Nasir çe tolışi milliə ruhe, Xıdo əvış bəmə bənə qəncinə xəzinə doəşe. Əli Nasir çe tolışi patyorə, kələntərə zoəy,  milliə ruhe.

Hejo həminə səhifədə çe Respublika Tolışi Mədəniyyətə Mərkəzi Mətbuatə Xidməti Məlumat dərc bıə. Həminə məlumatədə votə bedə ki, imsor oktyabri 1-ku de tosə 10-y Azərbaycanədə əhali aşmardəy dəbəvarde. Həmonə prosesədə bəpe har tolış aktiv iştirak bıkardo , ıştə milləti  tolış bıdo nıvışte.

Im səhifədə çe Atabala Babayevi "Befərə zəndon" nominə publisistikə nıvıştəyədə dı qılə vəyə muzakirə bedə. Qıləy ləzqiə vəyədə həmmə ləzqion xəy-dıvo ıştə moə zıvonədə dodənbu, tolışə vəyədə tolışon ısə xəy-dıvo tırki zıvonədə dodən. Bə Atabala muəllimi sıxan doədə əv qəp jedəni,  votedə ki, çımı qəp bə tolışie, tarsedəm tolışon mıni dənırəson.

 Rujnomə peşonə səhifədə şair-publisist Camal Lələzoə "Vəzifəpərəst" nominə hekayədə ıştə ğəhromoni simadə vəzifəbazon, de rışvə bə vəzifə şəkəson bə mizon qətedə, çəvon bə cəmiyyəti jə ziyoni bə əhandon rosniedə.

Seminə səhifə çe sərredaktor Rafiğ Cəlilovi manşetə səhifəy ki, əyo əv "Jukovi plan" məğalədə hokumətiku tolışi zıvonə məktəbon, radio, televiziya, teatr, keşvəri universiteton qıləyədə tolışşunasi kafedra, Tolışə məholədə bo tolışi zıvoni reqional status tələb kardedə.

Rujnomə peşonə səhifəonədə çe Şirəli Əlyari "Alimi beəməl" hekoyə, etnoqraf Nəriman Tolışi "Liki əhali mənəviə mədəniyyət" nominə elmiə tədqiqati orəxnə poə, şair-filoloq Allahverdi Bayrami "Sıləhuədə bamə vıl" romani seminə vəslə, çe Baladdin Veşo "Keynə vindənim" nominə ğəzəl, çe Vuqar Həmati ce Bəxtiyar Ruşini "Xosə Məhol" kitobi həxədə dumuton dıminə poə, çe Nurəddin Şaya, Məxsun Perzə, Rufət Baxşıyevi iyən Zahir Əzəmət`i həxədə kırtə məlumat iyən çəvon kali şeiron doə bə.