Az.R-ədə siyasiə muhit bə demokratikə entexabati imkan dodəni.

Az.R -ədə çe Parlamentə entexabati təbliğat və təşviğatə mərhələ tiğoniə vaxte.

Isətnə realə vəziyyət jıqo nişon dodə ki, hokumət bənə dəvardə soron entexabaton bı səfən ıştə inzibati təzyiğ və soxtəkorə, ğanundarıştə əməlonku dast nıkəşışe, bə xalği ıştə layığinə fərzəndon bə Parlament vığande ro imkan nıdoşe. Həmonə şəxsonədə qıley – qeneral mayor Ğabil Məmmədovi namizədəti bə ğeyd nısənışone. Ey bə Respublika həmə instansiya məhkəməon şikat kardışe, əmo əvon iminə instansiya məhkəmə soxtə ğəror təsdiğ kardışone.

 Avropa Şura Parlamentə Assambleya 3 nəfəro ibarət numayəndə heyət yanvari 22-23-ədə bə Boku səfər kardəşone, de muxtəlif tərəfon didor dəvuniə bə peş ıştə jıqo fikir ifadə kardəşone ki, Boku hokumət Strasburğ məhkəmə ğəraron icra kardedəni, ımən şəhrıvandon vıyniəyədə effektiv iştirak karde huğuği bə şubhə ji dənodə. Haliyədə Az.R-ədə mevcud atmosfer bə demokratikə entexabaton xidmət kardedəni.

Entexabaton Monitorinq və Demokratiya Tədrisə Mərkəziən de vıjniə kompaniya qardışi əlağədar ıştə hesabat pevolo kardəşe. Im mərkəzi səvon Anar Məmmədli votəşe ki, məmləkətədə hokuməti onoə siyasi muhit bo muxalifə partiya və təşkilaton bərobər şəraitədə mubarizə barde ro munasib ni. Jıqo şəraitədə vıjniə proses həmə çəmiyyəti ne, cəmiyyəti muəyyən qrupi mənafe əhatə bəkarde, bə çəvon hakimiyyəti ğoym bıe xidmət nişon bədo.

Demokratikə Təşəbbuson İnstitutiən ıştə media monitorinqi nəticəon elan kardəşe. Meydan TV dərc kardə həmonə monitorinqi nəticəonku məlum bedə ki, çe məmləkəti 3 qılə telekanali- AzTV, İTV və Real TV səpe har ruj 4 saat, de tosə yanvarə manqi 17, 37 rujnə muşahidəon nişon doəşe ki,  ım vaxtədə şə informasion 94% bə iqtidari və bə çey tərəfdaron tarifi, təğribən 2% bə muxalifət bə bə çey tərəfdaron tənğidi   həsr bıə. Im TV-on bə çəvon xeyr hic qıley informasiya pevolo kardəşon ni. Im fakton sənibəton subut kardedən ki, ısətnə entexabatən çe hokuməti sərt nəzarəti jitono dəvardedə, bo muxalif ğıvvon fəaliyyəti ro bərobər və beğərəzə şərait soxtə bıə ni.