Əliyevi hokumət bə şiə cameə təzyiğonku dast kəşedəni.

Azərbaycani İslamə Partiya sədri əvəz, həmən Azərbaycani Ruhanion Məclisi uzv Haci Ilham Əliyev Devlətə Əmniyyətə Xidməti tərəfo dastqir bıə.

Bı barədə çey nezə odəmon bə “İslamın səsi” sayti xəbə doəşone. De ım fakti əlağədar Azərbaycani Ruhanion Məclisi bəyonat doəşe, Hacı İlhami dastqir bıe məhkum kardəşe, çe devləti muvafiğə təşkilaton vanq kardəşe ki, ım islamə alimi azad bıkardo.

Im hadisəku 2 ruj bə nav, fevrali 27-ədə Ağcabədi rayonədə Mısılmonon İbemonə Hərəkati 3 nəfər uzv – İlyas Ğasımov, İqbal Sadıqov və Elməddin Novruzov dastqir kardəşone. Isət çı hadisəku 3 ruj dəvardə, çəvon taleku tosə ısət hiç qıley xəbə ni. Çəvon ailə uzvon, həmən hərəkati rəhbəriyyət ıştə fəalon dızde xəbəku norohətin. Daxili Koon Vəzarəti bı barədə məlumat doəş ni. Hərəkati rəhbəriyyət bə ım fakti bənə hokuməti bə dindaron nubətinə təzyiğ və təxribati ğıymət doəşe.

Əlavən ğeyd karde vacibe ki, Mısılmonon İbemonə Hərəkat 2015-minə sori Nardarani faciə bə peş bə repressiya məruz mande, çey sədr Hacı Taleh Bağırzadə və həniən 100 nəfərisən vey fəal bə istintağ cəlb kardə bin, və əvon bə dıroz muddətinə zindonə cəzo məhkum kardışone.

Azərbaycani İslamə Partiya fəalonən 2011-minə sori bə şər və bıhtonə ittihami hədəf bin. Bo çey sədr Hacı Mevsum Samədovi 12 sornə, bo diqər uzvon muxtəlifə muddətinə zindonə cəzo bırişone.

Bə Azərbaycani şiə cameə fəal və təşkilaton jıqo beysur və beəmonə repressiya şəraitədə Boku hokuməti kolhındə siyasəti bey vardışe bekardışe ki,  xeyli azərbaycanıjə şəhrıvand bə DAİŞ-i umjən qıniəbe. 2017-minə sori Nezə Şərğədə bə Bəşəri Huğuğon dair Beynəlxalğə Komissiya bəyonatədə nişon doə bedəbe ki, bə DAİŞ-i çe Azərbaycanə Respublikaku 7 həzo 500 nəfər umjən qıniə. Boku hokuməti bə şiə fəalon munasibətədə kardə orəxnə təzyiğə hərəkəton çey ıştə həmonə kanə siyasəti dəvom karde nişon dodə.