Bo AİP sədri əvəz Hacı İlham Əliyevi cinayətə ko bino kardəşone.
Fevralə manqi 29-minə ruji Az.R Kutləviə İnformasiya Vasitəon Azərbaycani İslamə Partiya sədri əvəz Hacı İlham Əliyevi Devlətə Əmniyyətə Xidməti tərəfo dastqir bıe barədə xəbə doşone.
Im hadisəku 3 ruj dəvardə bəpeş “İsalmın sesi” sayti nıvıştışe ki, bə Hacı İlhami əleyh de Cinayətə Məcəllə 274-minə maddə cinayətə ko bino bıə və Səbayil rayoni məhkəmə çey barədə 4 manq zindonədə oğəte hukmış bekardə. Bı barədə bə çey əvlodon vəkil Qulnarə İlyasova məlumat doəşe.
Azərbaycani İslamə Partiya İdarə Heyəti de Boku hokuməti ım hərəkəti əlağədar ıştə bəyonat bə cəmiyyəti elan kardəşe. Bə “Maide.az” sayti istinadən həmonə sənədədə votə bedə ki, Hacı İlham Əliyevi dastqir karde, qıley dənırəsə, həmən ğərəzinə koe. Əv çand sorone ki, bə AİP yoliəti kardedə, çey fəaliyyətədə partiya uzvon hiç vaxt bə cinayətə tərkibinə əməli rast omənin. Partiya hisob kardedə ki, bə Hacı İlhami munasibətədə ım ğeyri-ğanuniə əməl bəşəri huğuğon darışteye, demokratikə inkişafə roy boştə səçın kardə devlətədə bə ım curə əməli ro doe əbıni, jıqo əməl Azərbaycani ictimaiyyati tərəfo bəpe məhkum kardə bıbo. Bə islami alimi fəaliyyəti ım ğədər beədalətinə munasibət iqlə deşmenon şo karde bəzıne.
Bəyonati orəxədə Partiya hokumətiku Hacı İlham Əliyevi kutohə muddətədə çe zindono vadoe, bo eyo ıştə siyasiə fəaliyyəti davam karde ro bemaneə şərait onoe tələb kardəşe.
İslamiə alim Hacı İlham Əliyevi bə cinayətə məsuliyyət cəlb karde, həmən bə zindon dənoe məmləkəti sandinə ruhani alim, dini xadim və ruşinəfamon xeyli norohət kardışe. De ım məsələ əlağədar əvon qıley iclas dəvunişone. AİP İdarə Heyəti uzv Akif Heydərli, Dini Azadion Mudafiə Mərkəzi sədr İlqar İbrahimoğlu, Azərbaycani Ruhanion Məclisi uzv Şeyx Sərdar Hacıhəsənli və həniən çand kəs numayəndon hokuməti ım hərəkət məhkum kardəşone.
Fevrali 22-ədə nomji məhbus Şeyx Sərdar Hacıhəsənli 3 sornə zindonə cəzo muddət orəxe, Əliyev hokuməti çey zindonə vırə tey onıqətışe, Cəmi 1 həftə bədiqə diqər islamə alim Hacı İlham Əliyevış bə çey vırə dəğande.
