Məmuron Lankoni beçizə ailəon şikati məsedənin.

Bə Boku hokuməti İğtisadiyyatə Vəzarəti de koronavirusə pandemiya mubarizə proqrqmi əsasən bo əhali dastəqi ro 2 milyard 500 milyon mənot vəsait co kardəşone. Bə bekorə odəmon minimum manqə məvacibi ğədər, yəni 190 mənot komək bəkarden.

Dəvardə rujonədə Lankoni i dastə beçizə ailə odəmon çe şəhəri Sosialə Mudafiə Fondi, iyən şəhəri İcra Hakimiyyəti binaon vədə cəm bıən, bəvon sosial komək karde tələb kardəşone. Meydan TV ım aksiya iştirakkaron votəyon bə cəmiyyəti nəzə rosniəşe. Rayoni əji İlqar Əliyevi bə muxbiri votəşe ki, ıştən əlile, 230 mənot pensiya sedə, 3 qılə hırdən hestışe, jimonə həmroş bekorəy, tosə karantini ıştə har rujnə nunəpuli ğəznc karde imkanış hestbe, ısət de koronavirusi əlağədar bə kəno beşe ğədəğən kardəşone. Hic kəs fikir kardedəni ki, kədə bınıştəmon çiç bəhəmon. Sosialə Mudafiə Fondədə çəmə şikati məseşon pidəni. Kəybəsə elan jəşone ki, de 190 mənotinə koməki əlağədar hiç kəs muraciət nıko. Bəmə votedən ki, çəmə nomədə zəmin heste, bə səbəb bəmə sosialə komək eqınidəni. Devləti rəhbər çokə odəme, pul co kardəşe, əmo məmuron ey bə əhali dodənin. Ey çimiku xəbəş ni, bıboşe tədbir bəvinde. Rayoni diqər sakin Bəxtiyar Muradovən votəşe ki, taksiədə ko kardedəbe, boştə baləlion nunə pul ğəzənc əkəy. Isət ım ğədəğən kardəşone. Xeyzoni co ğəzəncə inkan nişe. Əflatun Ağayaroğlu fikir yıqoe ki, hokumət bəvon nə ko dodə, nəən sosial komək kardedə. Nazir ıştən bo, kosibə əhali jimoni bıvindo ki, çəmə jimon kom rujədəy.

Lankoni şəhəri rəsmi təşkilatonku de ım problemi əlağədar bə muxbiri parsi cəvob doəşon ni.