Boku hokuməti Lankonədə əzadarəti məclison ğədəğən kardəşe.

De məhərrəmə manqi əlağədar Ğəfğazi Mısılmonon İdarə Ğaziyon Şura bə əhali tosiyə kardışe ki, məçit və ziyarətqahonədə mərasimon bə karantinə rejimi ğaydon muvafiğ dəvordonon. Çoko ki, Ğurani-Kərimi Bəğərə surə 195-minə ayədə nıvıştə bedə ki, “Deştə dasti ıştəni bə xəto eməğandən”, har qıley insonən ıştəni bənə korona virusi qıley xətoku muhafizə kardənine. Ğaziyon Şura həmən əhali dəvət kardəşe ki, peyvənd və xun doe kompaniyaonədə fəali iştirak bıkardon.

Bə Operativə Ğərarqohi noə ğaydəon əsasən məcitonədə 50 nəfərisən vey odəm bəpe nıbo, ıştənən çəvon kovidə pasportşon bəpe bıbo. Təəccubinə ko ıme ki, Lankoni məçitonədə məhərəmə əzadarəti məclison dəvunie təmom ğədəğən kardəşone. Bı barədə ruhani Ruhullah Axundzadə ıştə “Fasebook” səhifədə nıvıştəşe ki, Lankoni hokumət avğusti 8-ədə 600 nəfəro ibarət iclas dəvunidə karantinə ğaydəon boçi bəvon aid bedəni? Çəyoən bə ğəror omedən ki, Lankonədə əzadarə məclison dənıvunon. Axundzadə bəştə həmkaron muraciətən votəşe ki, çoko bedə ki, Respublika həmə məntəğəonədə məclison dəbəbunien, iqlə Lankonədə ım ğədəğən bedə? Ey ıştə həmməsləkon dəvət kardəşe ki, ıştə etirazə vanqi bekon, bı jıqo nohəxəti motijə nımandon.

“Sonxəbər.az” sayt de ım məsələ əlağədar bə Daxili Koon Vəzarəti Mətbuatə Xidmətə şebə rəis Elşad Nəbiyevi votəyon istinadən məlumat doəşe ki, Lankoni rayoni Sepadi diy sakin Ruhullah Axundzadə de ıştə feyzbuk profili vasitə ıştə zınəkəson bə dini mərasimonədə iştirak vanq kardəşe.  Bı səbəb əv bə Lankoni Polisə Şebə dəvət bıə,  Operativə Ğərorqohi tələb və ğaydəon bey izah kardəşone.

Əmo ım sayti Lankonədə məhərrəmə əzadarə məclison dəvunie ğədəğən bıe barədə nıvıştəş ni, Az.R co informasiya vasitonən bı həxədə sukut kardəşone.

Çimi bə navən Lankoni şəhəri əjiono i nəfər de Ğədr-Xum idi munasibəti ıştə kədə sufrə oj kardəşbe. Polison oməbin həmonə tədbir de qıley həvəşiəti vılo kardəşonbe, məclisi iştirakəkon bardəşonbe bə polisxonə, əvon kuəşonbe, bəvon qonə təhğiramzə dıjmon doəşonbe. Həmonə kəsoybən daxil 3 nəfər dini fəal bə inzibatiə zindonə cəzo məhkum kardəşonbe.

Polison jıqo hərəkəton i kərən nişon dodə ki, Boku hokumət karantinə rejimiku bə şiə fəalon və bə çəvon adət-ənənon əleyh sui-istifadə kardedə.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.