Qilonədə bırzə huşəon 98 faizi qırdə kardəşone.
Tosə bə ısət 233 həzo hiktor çı Qiloni bicoronku məhsulon qırdə kardəşone.
Bə İrib raporti əsos, Qiloni ditəsərrufat idarə muavin votışe: bırzə huşəon dıve ki Qilonədə Xordadə manqi oxoyku bino bıə be, tosə bə ısət de çokə prossesi iyən 233 həzo hiktor çı Qiloni bicoronku 98 faiz huşəon qırdə karde dəvom kardedə.
Seyd Əli Musəvi bə mekanizasiya kaştey iğtisodi bey iyən istihsol xərcon kam karde işarə və əlovəş karde: de diğğət bə məhsulon qırdə kardeyro ov iyən həvosəti çok bey tosə bə ısət 175 həzo hiktor çı Qiloni bicoronku məhsulon de maşini vositə qırdə kardə bəy.
Qiloni ditəsərrufat idarə muavin votışe: holihazirədə məhsulon qırdə karde fəğət ostani cənubi məntəğon əcumlə Rudbarədə mandəy iyən fermeron ıştə zəminon bo 2 minnə kaşteyro xususi Kolza ruyənə donə kaşteyro hozzı kon.
Proqonoz bıə ki ımsor 1 milyono 110 həzo ton şaltuk çı Qiloni bicoronku qırdə kardə bıbu ki çəyku 750 həzo ton sıpiyə bırz istehsol bəbe.