Tolışə vişəon ance dəvom kardedə

Tolışə məholi vişəon deştə endemik beməyon həmə dınyoədə məşhur bıe. Soveti vaxtonədə əv devləti tərəfo muhafizə bedəbe. Əmo çoko ki, Az.R mustəğil bıe, ım vişəon ıştə muhafizəku məhrum bin

Diə məkəmon ki, çıvrey çanədə doon, beməyon, entomoloji nevon bə dınyo “Sıə kitob” daxil kardəşon bıe, Boku hokuməti tərəfo Tolışə məholi təbiəti çe muhafizəku məhrum karde, bey qonə zərbə jeşe. Haliyədə bə “Ecofront” təşkilati fəalon doə məlumaton nəzər səğandeədə, məlum bedə ki, Tolışə təbiəti məhv kardə siyasət hələən dəvom kardedə və məqəvuji Boku hokumət bə ım vandalizmi orəx doe ğodrətədə ni.

Meydan TV bə “Ecofront”i fəalon doə məlumaton istinadən nıvıştedə ki, əvon iqlə Cəlilobodi vişəvonətiədə ki, bə Masəlu Rayoni Vişə Təsərrufati Mərkəzi tabeye, 225 qlə doy ğeyri-ğanuni bırie fakt bə ğeyd səşone. Imon əsasən Nil, Ambur, Uləs, Bəlelə doonin ki, nomşon “Sıə kitob”ədəy, əvoni de hiç qıle vonə bırie əbıni. Ekoloqiya muhafizə kardə fəal Cavid Qara votedə ki, çe Masəlu rayoni Xocavar diədə taxtə sex ko kardedə, həmonə doonən ə sexədə kəşedən bə Boku mebelə fabrikon dəro kardedən.

Ostoro rayonədən vəziyyət ım çurəy. Barzəband diy sakin Ramil Aslanovi bə Virtual.az satyi şikat kardəşe ki, diy əhali bə vişə ande imkan dodəni, ıştən mubarizə bardedən ki, ıştə ətrofi təbiəti muhafizə bıkardon, çunki hokumət bə çəvon şikati əhəmiyyət dodəni. Hokuməti dələdızdə dastə niyoəkle omedən vişədə doon lu kardedən, bə çəvon bın mazut ekardedən, əvni de maha hıl kardedən ki, doon hışk bıbon, çəyo əvoni bıbıron. Haliyədə 200 qılə do de ım roy zədəjə kardəşone.

Ekologiya mudafəkaron həmən votedən ki, vişə munbitə  zəminonən kırnidən bə ətrof rayonon bardedən. Siənə qiliə zəmini isə bə kərpicə zavodon kırnidən. Cəlilobodi Soyuğbulağ diy əji Mirxas Sadığovi voteku məlum bıə ki, çəvon diy nezi 1 hektar ərazi zəmin kırnie nəticədə qıley nığılə xıl bə əməl omə.

Masəlu İcra hakimiyyətiku votəşone ki, ım məsələ bə çəvon səlahiyyəti daxil ni. Rayoni Vişə Təsərrufati Mərkəzədə isə ım fakton bə həşə jəşone, votəşone ki, 2-3 kəs heste, bə çəvon koy pepışie pidəşone.

Eko-fəalon isə bəvon cəvobədə votəşone ki, bənə çəvon vandalə əməlon təsdıği dastdəşon foto – video fakton hestin.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.