Dionədə stabilə koon icod kardeyro çand milyard tımən krediti ixtisos doe.

İroni dastqirəti inkişof banki rəis votışe: ımsor İronədə 4 həzo milyard tımən kredit dionədə ko icod kardeyro ixtisos doə bəy.

Bə Qiloni Telerədio aqentiyəti raporti əsos, İroni dastqirəti inkişof banki rəis Qilonədə qılyə kisə dute fabrikaku vindemonədə votışe: çunki ım fabrika istehsol iyən ko cəhəto muvəffəğ be, dionədə stabilə ko kreditiku istifodə karde bəy şomil bıdə iyən ğanun təsdigış karde bəbe bə ım fabrika 14 milyard tımən kredit ixtisos doə bıbu ta de istehsoli 2 minnə xətti bino karde vositə ım fabrikaədə ko həm 2 bərobər bıbu.

Huccətullah Məhdəviyan əlovəş kardə: bo dionədə ko icod kardeyro dastqirəti inkişof bank bənə asli bank ımsor 4 həzo milyard tımən kredit dionədə ko icod kardeyro ixtisos doəşe ki tosə bə ısət çəyke 2 həzo 700 milyard tımən doə bəy iyən co krediton bə iğtisodi mudiriyət texniki tovcihonışon bıə planon doə bəbe ki həm mıvcudə ko hifz bıbu və həm çəyku vey muhim ıme ki tojə ko icod karde səbəb bəbe.

Məhdəviyan bə Qilonədə ko icod kardero krediton ziyod bey həm işorəş karde və votışe: dəvardə sor Qiloni Ostanədə 550 milyard tımən ko icod kardə kredit ixtisos doə bəy ki ımsor de mudiriyət iyən plan kəşey vositə ım miğdor bə 750 milyard tımən bərəse.