Bə Şəhid Suleymani şəhodəti 2 minnə sorəqardışi xoto məxsusə mərosimon.

Imruj Dey manqi 13 İroni Sepahe Ğuds təşkiloti nakonə fərmondə iyən dılon sərdor, Şəhid Hac Ğasim Suleymani şəhodəti 2 minnə sorəqardışe.

Qilon ostanədə zinə rujiku məxsusə bərnamon bino bıə ijən dəvom kardeydə.

Xəbə omə ki ımruj Qiloni 45 qılə vıjniyə bıə imomzodəonədə dılon sərdori şəhodəti məxsusə mərosimon bərpo bəbe.

Bə İRNA raporti əsos, Qiloni vəğf iyən xəyrə koon idorə yol Huccətul İslom Səccad Kazemipur ın xəbə barədə votışe: ımrujnə rujiku və bə şəhid Suleymani iyən Həzrəte Fatemə(s) şəhodətə əyyomi xoto Nəbəvi Yas nomo bıə əzo iyən de Kərimə Ğıroni unsiyət qəte mərosimon bino bıdə.

Xorək pəketon təğsim karde, bəsirət nımoyeşqo bərpo karde iyən bə İmomzodəon tərəfi de piyodə lenqi şemon, həminə əyyomədə bıə co məxsus bərnamonin.

Rəştədə həm de şəhid Ğasim Suleymoni şəhodəti sorəqardışi həmzəman iyən de Sepah təşkiloti koməki 72 həzo xorək pəketon çı musavat nomo humanitar kompaniya ğolibədə ehtiyocinə ailəon miyono təğsim bıə.

Qiloni Sepah təşkiloti fərmondə, qeneral Əbdullahpur həminə mərosimədə votışe: şəhid suleymani çı İmom Huseyn(ə)-i məktəbi şoqird be ki ıştə jimoni islami jintonədə fidoş karde və Xıdo həm çəy cihodi mokafati jəğoş do ki ısət əv çı dılon sərdore.

Co qılə xəbə həm ıme ki bə Şəhid Hac Ğasim Suleymani şəhodəti 2 minnə sorəqardışi xoto ımrujnə rujiku Qilonədə dılon sərdor nomo volibol ostani rəğobəton həm bino bıə.

İroni Sepahe Ğuds təşkiloti fərmondə, qeneral Ğasim Suleymani 2sor çimi bənav de İraği rəsmi şəxson dəvəti bə ım məmləkət səfərış kardə be ki, de Amerkə təcavuzkor iyən terroristiyə ğıvvon xəbisə əməliyoti vositə Bəğdadi airporti nezi bə şəhodət rəsə.