Qilonədə Sərdor tosə Sərdor nomo festivol sə be.

Əzizon bə şəhid hac Ğasim Suleymani şəhodəti 2 minnə sorəqardışi xoto məxsus mərosimonku qıləyni Qilon ostanədə Sərdor tosə Sərdor nomo hınə festivol be ki de vıjniyə əsəron iyən hınə soybon elani sə be.

Bə İrib raporti əsos, həminə festivoli bəxşon şikil, təhlil raporton, dılnıvışte iyən mətniku iborət be ki de Qiloni məşhurə ğəhrəmon şəhid Mirzo Kuçəkxane Cənqəli ğiyom iyən islom dınyo muğaviməti fəxrinə sərdor şəhid Hac Ğasim Suleymani məktəbi miyono bıə rabitəon mehvəriyəti bərpo bıə.

Qiloni ostandar, Əsədullah Əbbosi həminə festivoli oxoədə bə ın 2 qılə sərdorə şəhidi xusyəton işorəş karde və votışe: şəhid Mirzo Kuçəkxane Cənqəli iyən şəhid Hac Ğasim Suleymani ham ciqəmand və həm imonin bin ki zılm iyən sitəmi vədə əvoni bənə muğaviməti simvol bə hisob varde bəbe.

Dəvardə haftə 2şambə, Dey manqi 13, İroni Sepahe Ğuds təşkiloti nakonə fərmondə iyən dılon sərdor, Şəhid Hac Ğasim Suleymani şəhodəti 2 minnə sorəqardış be.

İroni Sepahe Ğuds ğıvvə fərmondə, qeneral Ğasim Suleymani 2sor çimi bənav de İraği rəsmi şəxson dəvəti bə ım məmləkət səfərış kardə be ki, de Amerkə təcavuzkor iyən terroristiyə ğıvvon xəbisə əməliyoti vositə Bəğdadi airporti ətrofədə şəhid be.