Qilon de məntəğə kişvəron iyən Avrasiya rabitəon mərkəze.

Zinə şəv bə Qilon çı İroni Prezident və dəy bə ico bıə heyəti səfər sə be.

Ağaye Rəisi Qilon ostani idori şura iclosədə ijən bə Şimol-Cənub ticori karidorədə ğəror qətey xoto Qiloni stratejik əhəmmiyəti işorəş karde.

Bə İrib raporti əsos, İroni prezident həminə iclosədə bə dıyo, turizm iyən ditəsərrufat baxşonədə bıə Qiloni zərfiyəton işorəş karde və votışe: şimol-cənub iğtisodi-nəğliyot muhimmə karidori komil kardeyku i baxş bə Qilonədə reyls iyən roon komil kardey vabəstəy ki de ın ko bə vırə rosniye həm ostanədə inkişofi şoyd bəbemon və həm cıvononro ko icod bəbe.

Ğeyd kardənine ki zinə Ənzəliədə doktor Rəisi, bə Kaspiyən ozodə məntəğə reyls plani 70 faiz komil bey işorəş karde ki tosə omə 7 manqi sə kardə bəbe.

Əmmo de Ayətullah Rəisi səfəri həmzəman çəy vəziron həm bənə dıvləti nımoyəndəon bə Qiloni muxtəlif şəhron şə bin.

Masalədə rabitə iyən informasiya texnoloqiyaon vəzir ın tolışə şəhri çandə çəvon ko nimə mandə loyehəonku diyə kardey cərəyonədə bə koon bə vırə rosniye zəruriyyati təkidış karde.

İsa Zarepur Masal şəhri idori şura iclosədə votışe: ın şəhri muşkilaton barədə ki veyni budcə nerəseyku şomil bıdə bə prezidenti raport bədam.

İroni prezident bə ostanon osəğande səfəron çərçivədə qıləy i rujə səfəri çərçivədə zinə sıb bə Rəşt varid bıə be.