İroni Ostoro qomrukiu əmtəə və məhsuli ixracat, 93 faiz vey be.

Əzizon, İroni Ostoro qomruqi idorə sərpərəst votışe: ımsornə sori əvvəliku tosə Bəhmənə manqi oxo, de Ostoro şəhrıstoni zəmin, dıyo və reyls xətti marzon vositə, 1 milyono 611 həzo 900 ton məhsul və əmtəə ixrac bıə ki dəvardə sori muğaisədə vəzni cəhəto 93 faiz əlovə bey nışo doydə.

Səid Naderi zinə və de İrna jurnalisti mısohibədə, ımsornə sori 11 manqi mıddətədə, Ostoro marzonku ixrac bıə məhsulon və əmtəə erji 532 milyono 288 həzo 500 dollar bəyon və əlovəş karde: ın statestika nışo doydə ki dəvardə sori muğaisədə, ixracati erj həm 13 faiz vey bıə.

Ostoro qomruqi idorə sərpərəst, çın qomruqonku ixracati məhsulon və əmtəə, kaştımon, nat kimyə, məədəni və plastiki məhsulon, kaşi, seramik, məədəni cur bə curə sığon iyən şıti məhsulon, həmçenin muxtəlifə moyon şomil elan kardışe.

Naderi ijən bə İroni Ostoro qomruki məhsul və əmtəə varid bey miğdori, 191 həzo 535 ton iyən çəy erji 99 milyono 607 həzo və 154 dollar elanış kardə və votışe: dəvardə sori muğaisədə, bə İroni Ostoro qomruki məhsulon və əmtəə varid bey miğdor, vəzni cəhəto 14 faiz iyən erji cəhəto 27 faiz əlovə bey nışo doydə.

Əv dəvardə 11 manqi mıddətədə məhsulon tranzitiku çı Ostoro qomruki kəsb kardə bəromə həm 1 həzo 90 milyard riyol elanış karde.