Masalədə Nəvuzə idi adəton iyən hol-həvo(1)

Xosə Tolışon səlom, şimə nuyə sor mıborək bıbu.

Nəvuzə idədə iyən bəharə fəsli rujonədə şıməro ğəşənqə ləzəon iyən jimonədə hərəbaxtəti urzu kardəm.

De ımrujnə xəbə reportaji dəmə bə ico bımandən.

Əzizə əməson, Nəvuzə id, həmmə milləton xususi Tolışonro bənə qıləy kanə, torixi iyən erjinə adət və mərosimi zıney bıdə.

Tolışon ijən bə bəharə fəsli umid dəbasteydən ta nuyə sorədə iyən de Xıdo koməki bə xəyrin və bərəkətinə jimoni bino kardeyro çəvon dıl xoş bıbu.

Əmmo İroni Masalədə millət Esfəndə manqi oxonə rujonku yəni həmonə zəmon ki həvosət iyən zəmin qədə-qədə de həşi vositə qam bıdə, moxtəlif adəton ğolibədə bə nəvuz iyən bəharə fəsli pişvoz şin və ın əyyomi xoş dəvoniyeyro ıştəni hozzo kardeşone.

Masalıjon bə Esfəndə manqi, "hud ya Aftab bahud" votedən.

Bə Nəvuzə idi nez bey xoto Tolışə kinəon və jenon vey zovğin, kə koon əncom doe zəmonədə bəharə fəsli dəme mınosibəti bə yande mojdəvonəti dodən iyən çəy barədə xəbədo bıdən.

Zımıstonə əbzoron qırdə karde və əvoni bə kəno noe iyən çəy əvəzi bə nəvuzə idi aid bıə ailə və kə uzvon əbzar-təchizaton təmiz karde iyən əvoni sə-saman doe, kulli surəti Masal əholi bə ın yolə idi pişvoz şe iyən çəy intizorədə mandeyku şoəti və meyli nışo doydə.

Əmmo, zinə şəv iyən bə Nəvuzə idi mınosibəti xoto Qilonədə bıə vəli-fəğih nımoyəndə Ayətullah Fəlahəti iyən Qiloni ostandar Əsədullah Əbbosi ın ostani əholiro Nəvuzə idi təbrik mesaji vığandey kənoədə nuyə sori bo qilonıjon bənə umid və jimonədə tojə ənqizə icodəkə bə hisob vardışone.