Masalədə Nəvuzə idi adəton iyən hol-həvo(10)

Xosə Tolışon səlom, Nəvuzə idi bəşımə təbrik ərz kardəm, şımə nuyə sor bud bıbu, ımruj çı ımsornə sori Nəvuzə idi 13 minnə ruje ki İroni təğvimədə Təbiəti ruj ğeyd bıə.

Ailə kənoədə xoşə ləzəon dəvonən, dəvət kardəm ki de ımrujnə xəbə reportaj baxşi dəmə bə ico bımandən.

Mehribonon, Tolışon həm Nəvuzə əyyomi oxonə ruj yəni Fərvərdini 13 minnə ruji, çı səyohət iyən təbiəti ruj zıneydən.

In rujədə cəmaət ıştə tojə oləti tan kardən, kəyku xarıc bəben iyən bə band, vişə, dıyo ya xod ruon kəno bəşen ta de şoyvonəti ıştə rujışon təbiəti kənoədə dəvonon, əv həm de bə təbiət ehtirom noe ğolibədə.

Məsələn Qiloni ğərbədə Punel nomo tolışə məntəğə, çı təbiət ruji dəvoniye vey məşhurə məntəğəonku qıləyni bə hisob omeydə ki vey odəmon bə ım vırə şedən iyən kollektiv surəti Şəfarud nomo bıə ru nezi təbiət ruji dəvoneydən.

Bəharə fəsli 13 minnə ruji səyohəti dəvomədə tolışon, ru kənoədə bənışten iyən de yande sıhbət kardən, çoştə hardən və de muxtəlif hənək iyən xoşə fəaliyəton ıştə Nəvuzi 13 minnə ruji bə oxo rosneydən.

Tolışon tosə şəvi, dave və ixtilofiku bə kəno ıştə ləzəon dəvoneydən, boçi ki çəvon nəzəku ımrujədə xoşhaləti bois bəbe tosə sori oxo, de sulh, oroməti iyən dılişoəti yande kənoədə jimon kon.