Qilonədə çay havzə livəon bəhar çınye bino bıə.

Əzizə Tolışon səlom, Rəməzan mıborəkə manqədə dıvo kardəm şımə nımoj- rujəon ğəbul bıbun, əzizon İmom Əli(ə)-i şəhodətə əyyomi bə şımə xosə həmzıvonon təsliyət ərz kardəm.

Dəvət kardəm dəmə bə ico bımandən və bə ımrujnə xəbə reportaj baxşi quş bıdənən.

Mehribonon, Qilonədə zinə rujiku, ımsornə bəharə fəsli çay havzə livə iminnə çınye bino bıə.

Bə İrna raporti əsos, zinə ruj, Fumən şəhrıstonədə, çayəvonon çay havzə livə çınye bino kardışone iyən vəoməy rujonədə həm Qiloni co şəhrəstononədə bəharə çay çinye bino bəbe.

İroni çay Təşkilat yol bə ım nuktə işorəş karde ki çay havzə livə hıryero, fabrikaon tərəfo hozzoəti elan bıə iyən votışe: Qilon iyən Mazəndəranədə təğribən 170 qılə çay fabrika, bo çay havzə livə zəmonət hıryero ıştə hozzoəti elan kardəşone.

Həbib Cəhansaz əlovəş karde: tosə bə ısət,  çay havzə livə hıryero de 100 qıləku vey fabrika, təvafuğ bıə.

Əv əlovəş do: ditəsərrufati əsosiyə məhsulon himoyə siyasəton çərçivədə iyən ğeymət noe şura tərəfo, ımsor i minnə dərəcə çay havzə livə zəmonət hırye ğeymət, 9 həzo 200 tımən iyən 2 minnə dərəcəro 7 həzo 100 tımən təiin bıə ki dəvardə sori muğaisədə təğribən 40 faiz əlovə bey nışo doydə.

Bə tojə statestikaon əsos, Qilon iyən Mazəndəron ostanon, 55 həzoku vey çəyəvonon ko kardən, iyən ım  2 qılə ostanoni çayə boğon hevujəti təğribən 25 həzo hiktore.

İşorə kəmon ki çay havzə livə çınye har sor bəhar, tovoston iyən pozə fəslonədə əncom bıdə.