Qilonədə Ğədrə şəvi mərosim

Bə şımə əməson səlom ərz kardəm, şəmə nımuj-rujəon ğəbul bıbu, Ğədrə şəvədəmon, qıləy şəv ki çəy fəzilət de 1000 manqi fəziləton bərobərəti kardedə,

Bəle, mıburəkə Rəməzonə manqi rujonku 20 ruj dəvardə və ısət ın manqi 21 minnə şəv rəsə,

Əzizon, Xıdo Kərimə Ğıronış Ğədrə şəvədə nozil kardəşe, انا انزلناه فی لیله القدر

Co tərəf, anədə rəvoyəton və hədisonədə həm bə ınşanqonə şəvi mənəvi vırə işorə bıə ki muminə inson çəyku dəvarde əzı ni.

Şımə ibodəton ğəbul bıbun,

Az ısət Qiloni Ğədrə şəvi mərosimonku bəşımə raport dodəm, 

Imsorə Rujə mo 2 minnə Ğədrə şəvi hol-həvo barədə jığo votey bıdə ki, Tolışə millət bənə Qiloni həmmə mısılmonon, 2 sor çı Koronavirusi pandemiya məhdudiyəton bəpeşt ijən İmomzodəon, məçidon, huseyniəon və məzhəbi vırəonədə ıştə hərorətinə iştiroki bino kardeşone və vindey bıdə ki məzhəbi mərosimonədə iştirok iyən de xıdo unsiyət qəteyro Tolışə muminə xalğ çandə meylışone heste,

Tolışon ki çı Ğədr yaxod Əhyoə şəvi fırsəti erjiku çok-çoki aqahin. ın şanqo kollektiv surəti cəm bıən, dıvoon zomzomə kardedən, Ğıroni bə sə noəşone və de الهی العفو vanqi, Xıdoku baxşış iyən məğfirəti ocizonə tələb kardən.

In şanqoədə hıte mənoş ni və jığo ki muşahidə bıdə Tolışə xalğ tosə səhərə vaxti oğoiin və de bə İmom Əli(ə)-i təvəsuli, İmom Zəmon(əc)-i nəzdə bəştə 1 sori ğiflətədə kardə koon etirof kardən.

In şanqonə mərosimədə veyni bə çəş omə çi, ijən cıvonon və tojə nəsli hərorətinə iştiroke ki çı Tolışə xalği miyono dini prinsipon əhəmmiyət iyən mısılmonçiyəti nışonəy.

Əmə həm dıvo kardeydəmon ki ınşanqo Ğədrə şəvədə, Xıdo tərəfo şıməro xəyrə təğdir iyən tale təiin bıbu,

İnşaəllah ki Əhyoə şəvon fırsətiku tam istifodə karde bə həmmə Tolışon xususi bə şımə əməson ğısmət bıbu.