Fıtrə idədə bıə İroni Tolışə xalği adəton.
Əzizə duston səlom, ımruj Fıtrə idə ruje, ım əzizə idi bə şımə xıdmət təbrik ərz kardəm, enşaəllah Xıdo dərqohədə, şımə i manqi mıddətədə bıə ibodəton iyən Xalısonə dıvoon ğəbul bıbu. dəvət kardəm de Tolışi rədio bə ico bımandən və bə ımrujnə xəbə reportaj baxşi quş bıdənən.
Mehribonon, Fıtrə idə rujədə, Tolışə millət ziyorətiro bə muğəddəsə vırəon şedən, məsələn Masalədə bıə Şalma diədə İmom Musə-bne Cəfər(ə)-i zoəonku qıləyni bə Seyed Rıza Əli iyən Seyed Muhəmməd Əli nomo məşhurə imomzodə qıləy mənəvi məntəğəy ki Rujə idədə vey izdihomin bəbe.
Masal Tolışə şəhrədə, ğərəz ım imomzodə, coqılə imomzodəon iyən turistik cəhəto vey ğəşənqə vırəon həm hestin. Məsələn Mirməhəllə mıtəbərrikə imomzodə, Sənq bəst, və Şandeməni səyohəti vırə iyən imomzodəon, İmomzodə Şəfi(ə), Ağa seyed Rıza(ə), Ağa Seyed İbrohim(ə) iyən ğəşənqə qıyəon.
Əzizon, Fıtrə idə rujədə tolışə sınnion həm muxtəlifə xorəkon iyən xavloonku pur bıə məcməon bə mıtəbərrikə vırəon iyən ğəbıstonon bardən iyən Fıtrə idə ruji mərosimi bərpo kardən.
Əlovə kəmon ki Tolış havz iyən kanə sərzəmini əholi, bə Fıtrə idi fəsli əsos, əlovə bə mıtəbbərikə imomzodəon və məzhəbi vırəonədə iştiroki bə təbiət, kanə vişəon, ru kəno iyən qıyəon həm şeydən və Fıtrə mıborəkə ruji mərosimi vey şo iyən hərorətin surəti bərpo kardən.
Əmmo Tolışə məntəğəonədə co vırəon ki Fıtrə idə rujədə, Tolışə xalği iştiroki mizbonəti kardən və həm səyohət iyən ziyorət vırəonku bə hisob omeydən, Şəft şəhrıstonədə İmomzodə İshoğ(ə) iyən İmomzodə İbrahim(ə), Aliyan Siyah ruədə Ağa Seyed Kəlrum(ə), Fumənədə Şəhid Ağa seyed Cəvad Musəvi, Rizvonşəhrədə Şeyx Suleyman Pəresəri, Ləvəndəvilədə İmomzodə Əbulfəzle Əbbas(ə), Ostoroədə İmomzodə Ğasım iyən İbrahim(ə), Lisarədə İmomzodə seyed Cəloleddin(ə)ku iborətin.
Əzizon ijən ım yol və əzəmətinə idi bə şımə xıdmət təbrik ərz kardəm, ğəşənqə ləzzəon bə şımə ğısmət bıbu.