Ayətullah Bəhcəti mənəviyə məğom, salehə əməlon iyən daemiyə təğva nəticəy.

Əzizə Tolışon səlom, ımruj həm co qılə reportaji bə şımə xıdmət təğdim bəkamon ki Ayətullah Bəhcəti vırə yol qətey mərosimi barədəy, dəvət kardəm dəmə bə ico bımandən və bə ım baxşi quş bıdənən.

Ayətullah Bəhcəti məğomi yol qətey mərosimədə, Tehroni cımə mıvəğğətə İmom votışe: ım yolə alimi mənəviyə məğom, çəy daemiyə təğva iyən salehə əməlon nəticə be.

Bə İRİB raporti əsos, tojədən Rəşt şəhrıstoni Səfi nomo bıə məçitədə, Ayətullah Bəhcəti məğomi yol qətey mərosimədə, Huccətul İslam Muhəmməd Həsən Əbutorabifərd bə ım nuktə işorəş karde ki bə Xıdo səmti hərəkət kardey, İlahi viloyəti nəticəy, votışe: alimonku kalion vey rə bə İlahiyə nuri tərəf hərəkət kardən ki çəvonku Ayətullah Bəhcət qıləy oşkoə nımonəy.

Əv işorəş karde ki fəğət salehə əməle ki karde bəzne insoni bə kəmol səmti hərəkət bıdə, iyən əlovəş do: salehə əməl, insoni təhrikəkə maşin bə hisob omeydə və bəzi vaxt 1 qılə çokə əməl karde bəzne qıləy şəvədə iyən rə, insoni bə barzə məğomomi bırosno.

Tehroni mıvəğğətə cımə İmom həmçınin votışe: Ayətullah Bəhcət yəni çokə əməlon simvol, çən bəpe ə yolə alim jığo zıney bıbu.

Huccətul İslam Əbutorabi bə ım nuktə işorəş karde ki Ayətullah Bəhcət ıştə umrədə həmişə mığət be ki qıləy ləzzə həm, Xıdovənde Xalıği yodiku be xəbə nımando ki ım həğiğətən mənəviyə məğom, salehə əməl və daemiyə təğva nəticəye.