Rizvonşəhrədə, kuçəkə toyfəon moləvonon Bəharə kuçi iminnə festival bərpo bıə.

Xosə Tolışon səlom, şımə ruj bə xəy bıbu, dəvət kardəm bə ımrujnə xəbə reportaj baxşi quş bıdənən.

Əzizon, tojədən Rizvonşəhri Şalra məntəğədə bıə Biyəçol qıyədə kuçəkə toyfəon  moləvonon Bəharə kuçi iminnə festival de “Rəmə Şe” nomo bıə unvavi bərpo bıə.

Bə İrna raporti əsos, ım festivalədə ki Rizvanşəhri fərmandar, Qiloni turizm iyən nəcimə sənaye və mədəni irson rəis iyən Qiloni moləvonəti və kuçəkə toyfəonəon koon yol, həmçınin Rizvonşəhri co qılə rəsmi şəxson həm iştirokışon be, muxtəlifə hınə, mədəni iyən varzışi bərnoməon bərpo bıə və oxoy sə ım şəhrıstoni cəhdəkə moləvononku ğədrdonəti be.

Həminə festivalədə, Rizvonşəhri fərmandar votışe: kuçəkə toyfəon bənə İlahi Peyğəmbəronku çokə adəton irs bardə kəsonin, və  istehsoli prossesədə vey muhimmə rolışone.

Seyed Nader Səfəvi əlovəş do: ımrujnə ruj, əmə bənə rəsmi şəxsi məsuliyətımone ki həminə çokə adət-ənə, oqətəmon və bə vəoməy iyən tojə nəslon ovoştonəmon.

Səfəvi ım festivali hədəfon, kanə erjinə mədəniyət iyən adət-ənənon bəji kardey zıneydə be iyən votışe: İroni iğtisodi bə inkişof rəsey royədə, kuçəkə toyfəon rol vey muhim və erjinin, iyən iğtisodi, mədəniyət və siyasi baxşonədə həmişə kuçəkə toyfəon bənə ictima maşini, kişvəri həxədə ıştə məsuliyəton nışo dodən, bə çəy xoto bəpe çəvonku himoyədorəti bıbu.

Rizvonşəhri fərmandar ijən votışe: kuçəkə toyfəon, karde bəznen əlovə bə xususi baxşi zumand kardey, istehsol və ko baxşonədə həm de mıvcudə zərfiyətonku istifodə kardey, təhəvolaton bois bıbun.

Səfəvi əlovəş do: qıyə məntəğəonədə, kuçi adəton, məhəlli hənəkon və hətto qıləy kuçəkə toyfə siyo çador, karde bəznen bə ko iyon turizmi sənaye rovnəğ bıdə.

Əv ijən əlovəş do: protein iyən şıtə məhsulon və dasti sənaye, əcumlə çı kuçəkə toyfəon istehsoləkə məhsulonin, iyən ın qurup çı İroni-İslami nəcib və erjinə mədəniyəti soybin ki bəpe ım məəniyəti oqətəmon.

Rizvonşəhr 90 həzo sıbıkə mol, təğribən 30 həzo qonə mol və 900 ailə moləvoni soybe ki ım miğdoriku 218 ailə kuçəkə toyfə hestin, əvon har sor 1 həzo toniku vey  qujdi istehsol kardən.