Tolışədə Ğədir Xumi yolə idə ruji məxsusə mərosimon

Ğilan ostani viloyətsoybə millət Ğədir-Xum yolə idi mərosimonədə iştirok kardışone.

Bə Tolışi Sədo media mərkəzi raporti əsos, zinə şəv Ğədir-Xum yolə idi məxsusə mərosimon de Taleş şəhri bə vidoyət aşiğ bıə millət iyən rəsmi şəxson əcumlə Sepah təşkiloti rəis və farmondori iştiroki ın şəhri İmom Xomeyni(r) nomo meydonədə bərpo be.

Həminə mərosimədə şer, məhəlli avaz və təvaşi habde, saz və dəf jəe, iyən muxtəlif şoə bərnoməon bə imomət iyən viloyəti da rujon xoto və Ğədir iyən Ələvi mədəniyəti rəvuc doey çərçivədə vəvoniyə bəy.

Bənə jığonə mərosimon Masal, Fumən, Rizvonşəhr, Əsolım, Şandermən, Ostoro iyən co Tolışə məntəğəonədə həm bərpo be.

Imruj Zil-Həccə manqi 18 iyən İyolə manqi 18 Mısılmonon vey yolə idonku qıləyni Ğədir Xumi bərəkətinə idə ruje.

Ğədir Xum Məkkə iyən Mədinə miyono bıə qıləy məntəğəy ki İslami Peyğumbər(s) Həccətul-Vidaədə(ıştə əzizə umri oxonə Həccədə) dıyo şiəyon i minnə İmom, Həzrət Əli(ə)-i ıştəku bəpeş bənə İslamiyə umməti Vəli elanış kardə.

Həzrət Muhəmməd(s) ıştə oxonə Həcciku oqarde zəmonədə Həcc fərizədə həmmə iştirok kardə mısılmononış Ğədir Xum məntəğədə cəm kardeşe və həmonə məntəğədə Xıdo tərəfiku Həzrət Əli(ə)-i bənə ıştə Vəsi, Bıvə iyən ıştəku bəpeşt bıə İslamiyə umməti rəhbər elanış kardə.