Bə Şeyx Sərdar Hacıhəsənli dəstqir karde etirazon dəvom kardedə

Fevralə manqi 24-ədə Masalu şəhəri nomojəvoton jımmə nomoji bəpeşt de Şeyx Sərdar Hacıhəsənli dəstqir be əlağədar ıştə etirazi ifadə karde ro aksiya dəvuniəşone. Əvon çe Şeyx Sərdari şəkilon ıştə dastədə qətəşone və ey azad karde hokumətiku tələb kardəşone. Polison bə ım aksiya mudaxilə nəticədə, ım tədbiri iştirakəkonədə 15 nəfər bə şebə bardəşone.

Məhkəmə çəvonədə bo Həbibov Məhəmmədi 25 sutka, Rəhimov Salman və Şahverdiyev Fizuli 15 sutka, Məhərrəmov İmadəddin 10 sutka inzibati həbs çəzo bıriəşe. Əmandəyon i ğism cərimə kardəşe. Sərbəst vadoəkəson votəşone ki, polis şebədə əvon bə ğeyri-insonə rəftori məruz mandən. Im xəbə bə "Maide.az"i istinadən "Nuraz.com" sayti doəşe. 

Vəkil Cavad Cavadovi məlumat doəşe ki, de Şeyx Sərdar Hacıhəsənli həbsi əlağədar bə Şirvan Apellyasiya Məhkəmə şikayət vığandəşe. Bovə heste ki, məhkəmə ım ğeyri-ğanuniə ğərari ləğv bəkarde.

De Şeyx Sərdari dəstqir karde əlağədar Qurcistani, Sankt-Peterbirği, Dərbəndi ruhanion, Ğum şəhərədə azərbaycanıjə tələbon bəyanat doəşone, Boku hokuməti ım hərəkət məhkum kardəşone.

Tolışə reqioni sandinə ruhani Haci İlğar Əliyevən votəşe ki, bənə Şeyx Sərdari çanədə hurmətinə dini alimon bə zindon dənoe nişon dodə ki, deşmen islami səpe bə hucum beşə. Im həmən çəmə dini sofyəti, əğedə təmizəti qıley nışone.

"Nuraz.com" həmən xəbə dodə ki, dini fəal Şəhriyar Abbaslı Mahaçğalə şəhəriku bə vətən omeədə sərhədədə Az.R muhafizə orğanon tərəfo dəstqir kardə bıə. Çimi 10-12 ruj bə nav Biləsuvar sərhəd məntəğədən çe İrono bə vətən oqardə qıley imoninə dindar dəstqir kardəşonbe.

 Bə din əhli anədə təhdidon Boku hokuməti ım İslamə Həmrayəti sorədə bardə antiislam siyasəti bə oşko bekardedə.