Hostoro rayoni icra hakimiyyəti çe divojonku zəmini kaşte tələb kardedə

Çe Hostoro rayoni icra hakimiyyəti bə di əhali rəsmi çəşnavi vığandəşe ki, iştə zəminon bıkaşton. Əks halədə çəvon həxədə bə ğanuni muvafiğ tədbiron bəvinden.

"Maide.az" Arçoni diy zəhmətkeşon vəziyyəti barədə nıvıştedə ki, Coveti vaxtonədə əvon tərəvəz peərosnin, bə Rusiya şəhəron əbeyn. İsət bımiyo vəsait və imkan nıbe səbəbiku əvon ıştə məhsuli daxili vıjoronədə həvate məcbur bedən. Imən bey səbəb bedə ki, əvon ıştə zəhməti moyə bekarde zınedənin. Bə qorə ısət ım zəminonədə heyvon oqətedən, bo zımıstoni çəyo aləf tədaruk kardedən. Əmo rayoni hokumət votedə ki, zəminon məcburən bəpe bıkaşti. Diy sakin Akif Məmmədov votedə ki, hokumət bəmə zəmini kaşte ro hiç qıley koməqəti kardedəni, hiç nıbo çəmə perosniə məhsuli tədaruk karde ro məntəğəon oj bıko, bəvədə əmənən bəznemon ki, çəmə məhsulon hıriəkəs bəbe, sahədə əmandıni, zay əbıni. Diy zəhmətkəşon umumi fikir jıqoe ki, hokumət budcə nırəsəy de əvoni cərimə karde roy pur karde pidəşe. Həmən de nıkaşte vonə çəvon zəmini dastonkuşon se fikirədey. Əv Respublika co rayononədən  ım curə siyasət bardedə. "Azadlıq. info" Şaməxi və Haciğabul rayoni heyvandarə fermeron zəmini çəvon dasto seku xəbə doəşe.

Boku hokuməti bardə jıqo natarazə siyasəti nəticəy ki, marti 24 -ədə çe Azərbaycani bə Rusiya di təsərrufat məhsulon bardə 50 qılə bokırniə avtomobil çe Rusiya Kemruqi tərəfo 10 ruje ki, oqətəşone. Rusiya tərəf Azərbaycani çe Turkiyə məhsulon bə Rusiya vıjoron kırnieədə qınokar zıne səbəbiku ım məhsulon bəştə məmləkəti ərazi vadodəni. Çunki Rusiya de Turkiyə arədə embarqo siyasəti bərpo be bə jıqo vəziyyəti səbəb bıə.