Bəhruz Səmədov bə ictimoyyəti ovardə
Xarici mediadə Azərboyconədə de idorəti band tənğıdə məqalon muəllif, politoloq, Çexiya Karlov Universiteti doktorant Bəhruz Səmədov dı manq bə nav əçe barədə dastqirəti ğəror doə məhkəmə iclosədə de əy bevəcə rəftor beku qəpış jə be.
Məhkəmən əçe işqəncə şikati tədğiğ karde ro bə prokuratura ovardə be.
Çın ovarde səpe dı manq davardoən, prokuratura tədğiğat be nəticə mandə.
Bəhruz Səmədov iyən mudafiədor dın məsələ tədğiği anqıl bə məhkəmə şikatşon kardə.
Oktyabri 18-də Səbail Rayon Məhkəmədə de cıvonə fəoli şikati ro məhkəmə iclos dəvonə bə.
Bastə formədə dəvonə məhkəmə iclosədə Bəhruz Səmədov, prokuraturadə dın məsələ band oxonə ğəror nıbe səbəbiku ıştə şikati mıvəğğəti bə dumo peğəte ğəror omə.
De vəkili sıxani, əqəm tədğiğ nıbo, ikərən sikat bəkarden.
Bəhruz Səmədov bə məhkəmə vardeədə bə ictimoiyyəti ovardə: “COP29-də bə çımı sədo sədo bıdən”, votəşe.
Bəhruz Səmədov avqusti 21-ku dastqirətiədəy. Əv de Cinoyət Məcəllə 274-minə (bə devləti xəyonət) maddə ittihom bedə.
Əçe, de Erməniston xususi xıdmət orqanon ko karde iddio kardə bıboən,
əv ın ittihomi ğəbul kardə ni, ıştəni taxsikor zınedə ni.
Dastqirəti ğəror doə məhkəmədə əy, sulhpərvər, bə muharibə əleyh be, nıvıştə məqalon bın barədə be, ittihomi saxtə be bəyonış kardə.
Bə Səbail Rayon Məhkəmə vardə fəxtən bə jurnaliston hiç qılı taxsi nıbe votəşe.
“Bıjiyo sulh! Bıjiyo mərdumon boəti! İttihomon həmmə pesoxtən…”, – Bəhruz Səmədovi votəyonin.