20 ruj bə nav bə ozodəti vadoə fəol qətə bə

Mısılmon İbemon Hərəkati uzv, 7 sor dastqirətiədə bə peş,20 ruj bə nav bə ozodəti vadoə bə fəol Əhsən Nuruzadə qətə bə.

Bın barədə Mısılmon İbemon Hərəkati doə məlumotəda, dindorə fəoli oktyabri 26-də əçe kinə çəşi vədə qətə, bardə be votə bedə. Əçe bə kon səbəb qətə be, bə kon vırə bardə be həxədə bəçey əvlodon hiç qılı məlumot doə bə ni.
Əhsən Nuruzadə qəte həxədə xəbə əçe əvlodon tərəfo təsdığ kardə bə. De əçəvon sıxani, dindora fəol dərsiku oğardə kinə vəy beşə fəxt qətə bə.
Əhsən Nuruzadə moə Zeynəb Huseynova əçey vırə iyən qəte səbəbi zıne ro bə Dılətonə Koon Vəzarət, Ombudsman Aparatın ovardoən, hiç qılı nəticəş  bə daşt varde zınə ni.
İmoninə fəol Əhsən Nuruzadə 2017-minə sori oktyabri 6-də de narkotik ittihomi dastqir kardə bə be. Əv, de Boku Qonə Cinoyəton Məhkəmə hukmi 7 sor ozodətiku məhrum bə be. 2024-minə sor oktyabri 5-də bə ozodəti beşə be.
Əhsən Nuruzadə ıştəni taxsiko zınedə ni, ittihomi saxta be, Mısılmon İbemon Hərəkati uzv iyən təşkiloti rəhbər Taleh Bağırzadə tərəfdor be ro cəzo se votedə.
Nav narkotik ittihominən Əhsən Nuruzadə dı kərə de “bə polisi tələbi tabe nı be” ittihomi 10 sutkaninə inziboti dəsqirəti cəzoş sə be.
Holiədə Mısılmon İbemon Hərəkati 70-sə vey uzv dastqirətiədəy. Çəvonədə hiç qılə ittihomon ğəbul kardənin, de siyosi sifarişi dastqir karde be votedən.