Terror akt eçın qəteədə ittihom bə xonəxo məhkəmə istintoğ bino bə

Terror akton eçın qəte, Lankon şəhəri icro sərdor Taleh Qaraşov iyən reqionədə fəaliyyət nuşu doə əcnəbi muəllimi vəynə sui-ğəsdədə ittihom bə Bəhruz Əsqərovi koy ro oktyabri 29-də məhkəmə istintoğ bino bə.

Boku Qonə Cinoyəton Məhkəmədə dəvardə məhkəmə iclosədə prokurori ittihom aktış elan kardə.
İttihom aktədə votə bedə ki, 1988-minə sor təvəlludin Bəhruz Əsqərov de terrori anqıl eçınon bə jimon dəvone ro de muxtəlif məntəğonku bə odəmon mulağatonış bardə. Əçey nifrət kardə xonəxonədə qılıən Lankoni icro sərdor Taleh Qaraşov bə.
De İttihomi, Bəhruz Əsqərovi istə ətrofədə bə kəson  icro sərdori koy qrafik, şe-omə fəxton iyən əlidə çiyon həxədə məlumoton bə dast varde həxədə aspardəyonış doə.
Sui-ğəsd nəzədə qətə xonəxonədə qılıən reqionədə ko kardə əcnəbi inqilis zıvoni muəllim bə. Əçe de kılə aləti kışte nəzədə qətə bəbe.
İttihoməda, Bəhruz Əsqərovi Devlət Əmniyyətə Xıdməti  koəkon tərəfo qəte ro eçıni bə jimon dəvone mumkun nı be ğeyd kardə bə.
Bəhruz Əsqərov ittihomon i ğismış zıne bəyon kardə.
Devlət Əmniyyətə Xıdməti mətbuat xıdməti 2024-minə sori martə manqədə Bəhruz Əsqərovi dastqirəti barədə məlumot iyən videomaterialış pevolo kardə be. Pevolo kardə məlumotədə iddio bəbe ki, Rusiya Federasiya Murmansk şəhərədə jiyə 36 sininə Bəhruz Əsqərov de istə  ətrofədə bə xonəxon terror eçınon barədə kardə qəpi nıvıştəyon bə daşt vardə bə.
Videomateralədə Bəhruz Əsqərovi istə ifodədə Taleh Qaraşovi kışte piye səbəbi, 2018-minə sorədə Qəncədə bə icro sərdor Elmar Vəliyevi vəynə kardə sui-ğəsdi ro  ozodətiku məhrum kardə bə Yunis Səfərovi ğisasi sə be votəşe.
Bə Bəhruz Əsqərovi vəynə de Cinoyət Məcəllə muxtəlif maddon ittihom bə nav doə bə.
İcro sərdor zərərkəşəy ğismədə zınə bıboən, tosə ısət dəvardə məhkəmə icloson hiç qılədə iştirokış kardə ni.