Dastqirətiədə bə tolışə alimi mıkafat sə fiım qılıən beynəlxalğ festivolədə

Azərboyconədə dastqirətiədə bə tolışə alim İqbal Əbilovi “Fraqmenton” film  “Madrid Indie Film Festivolı”ədə (MADRİFF) nomayiş kardə bə.

Filmi festivolədə təğdimot İqbal Əbilov amuzoə, yumorist İdrak Mirzəlizodə kardəşe.
Əy, tədbirədə İqbal Əbilovi bə festivol təşkiləkon iyən iştirokəkon ovardeş handə.
İqbal Əbilov ıştə ovardemonədə, bo layihə real be ro komək kardəyon həmmə təşəkkur kardəşe, de elmi iyən ictimoi fəaliyyəti ro dastqirətiədə bə fəxtədə əy dastək kardə bə har kəsi minnətdor be bəyonəş kardə.

“Umu kardəm ki, omə rujonədə ədolət istə vırə bəğəte. Çımı qıno nı be sobut kardə bə be. Bə ozodəti beşə bə peş bə Madridə bomem, duston bəvindem, bə festivoli həmmə filmon diyə karde bəznem”, – İqbal Əbilovi istə namədə bəyonış kardə.
“MADRIFF”  sori dırozi manqinə nomayişon dəvonidə və bın mıddətədə bə rəsmi proqram dənoə bə filmon jyuri tərəfo nomayiş kardə bedə.
Ğalibon dekabrədə dəvardə əsos tədbirədə elan kardə bəben.
Noyabrədə İqbal Əbilovi “Fraqmenton” film İtaliyadə “Monza” beynəlxalq kino festivolədə “Ən çokə elmi-fantastik film” nominasiyədə mıkafatış sə be.
İqbal Əbilovi bəyonış kardə be ki, ın mıkafat Azərboyconədə bə həmmə siyosi məhbuson həsr kardə.
“Monza” kino festivol har dı manqisə curə-bəcurə kateqoriyonədə bə filmon vıjnidə.
Bə suni intellekt mevzu həsr bə “Fraqmenton”  kırtəmetrajinə bədii film 2023-minə sori kəşə bə.
Film aşığ bə dı androidi hekoyəku bəhs kardə.
Belarusədə jiyə tolışə alim İqbal Əbilov 2024-minə sor iyuli 22-də bə Azərboycon əvlodi vəyo omə fəxt dastqir kardə bə.
Azərboyconədə milli kamon, əz cumlə de tolışon band tədğiğat bardə etnoqraf İqbal Əbilovi barədə 2024-minə sor iyuli 24-də Səbail Rayon Məhkəmədə bo sıftənə istintoğ mıddəti ro 4 manq dastqirəti ğətimko tədbir vıjniyə bə.
İqbal Əbilov de Cinoyət Məcəllə 274 (bə devləti xəyonət), 281.3 (bə devləti əleyh oşkoə vanqon – de xarici təşkiloton və çəvon numayəndon asparde kardeədə) 283.1-ci (milli, irği, sosial və ya dini nifrət və deşmenəti eğande) maddon ittihom kardə bedə.
İqbal Əbilov de ın ittihomon rozi ni, ıştəni taxsikor zınedə ni.
Holiədə əv Devlət Əmniyyətə Xıdməti (DTX) istintoğ təcridxonədə oğətə bedə.
İqbal Əbilov Latviyadə ğeydiyyato dəvardə Tolış Milli Akademiyasının təsisəkəyonədə qılıye.