Muşfiq Cabbar bə kə dustoğəti vadoə nı be

“Toplum TV” internet televiziya 8 manqe dastqirətiədə bə video-redaktor Muşfiq Cabbari bə kə dustoğəti vadoe ro bə vəkili doə vəsatəti oktyabri 30-də Boku şəhəri Xətai Rayon Məhkəmədə diyə kardə bə.

Bastə dəvardə məhkəmə iclosədə jurnalisti iştənən iştirokış  kardə.
“Toplum TV”  koy ro Boku Şəhər Sər Polis İdarədə istintoğe bardə mıstəntığe jurnalisti bə kə dustoğəti vadoe etirozış kardə, hələ istintoğe dəvom kardə, ekspertizon dəvarde, sobuton qırd kardə be bəyonış kardə. Bın mıddətədə taxsikorə xonəxonədə bə Muşfiq Cabbari ozodətiədə mande bə istintoğe mane be, əçe bə şoydon təsir karde, istintoğeku opırtiye ehtimal be iddioş kardə.
Muşfiq Cabbar iyən vəkil Nazim Musayevi bə mıstəntığe etirozşon kardə.
Jurnalisti bəyonış kardə ki, hiç qılı cinoyət nıkardə holədə, 8 manqeki  beqıno dastqirətiədə oğətə bedə. Əy, bə jurnalist fəaliyyəti ro dastqir kardə be votəşe.
Vəkil huğuğon mıdafiə kardə xonəxo vəynə ittihomi beəsos olduğunu,  jurnalisti bə kə dustoğəti vadoe həxədə vəsatəti təmin be bıpişoən, hakimi vəsatətış rədd kardə.
Vəkili bəyonış kardə ki, Xətai Rayon Məhkəmə çın ğəroriku apelyasiya şikati bədo. 
Marti 6-də “Toplum TV” internet televiziya redaksiya iyən Demokratik Təşəbbuson İnstituti ofisədə polison əməliyyatşon dəvonə.
Dın cinoyət koy ro 9 kəs bə cinoyət məsuliyyət cəlb bə. Çımonədə 7 kəsi həxədə dastqirəti ğətimko tədbir vıjniyə bə, 2 kəsi istintoğ mıddətədə ozodətiədə oğəte ro ğəror doə bə.