Politoloq bə devləti xəyonətədə ittihom be 

Bın rujonədə 13 sor ozodətiku məhrum kardə bə Nəzakət Məmmədova əğıl bə əçey moə himoyə doə bə. Nəzakət Məmmədova autizm mərəziku əziyyət kəşə qılı kamsininə əğılış hıste.

Muxtəlif media orqanonədə bənə politoloqi qəp jə, əz cumlə “Alfa TV”  internet telekanali rəhbər Nəzakət Məmmədova 1 sorisə veye ki, bə devləti xəyonət ittihomi dastqirətiədəy. Əçe məhkəmə proses bə orəx rəşə. De Boku Qonə Cinoyəton Məhkəmə doə hukmi əsos de Cinoyət Məcəllə 274-(bə devləti xəyonət) maddə taxsikor zınə bə Nəzakət Məmmədova 13 sor ozodətiku məhrum kardə bə.
Əv, de Rusiya xususi xıdmət orqanon koəkon nunəkıle koədə, çəvon doə məxfi aspardəyon bə vırə rosneədə, muəyyən xonəxonən bın ko cəlb karde cəhdonədə və çın koon mığabilədə pul seədə taxsikor zınə bə. Nəzakət Məmmədovanın daim bə Moskva şe-omə çın koon qılı hissə, əyo de xususi xıdmət orqanon koəkon mılağaton barde iddio kardə bedə.
İttihomədə, Nəzakət Məmmədova muəyyən xonəxon barədə Azərboyconədə şə tədğiği koon barədə məlumot rosniye, rəhbərəti kardə internet kanalda bə Rusiya xeyr  təbılğat barde aspardəyon se və bə vırə rosniye ğeyd kardə bə.
Nəzakət Məmmədova, vığandə pulon de poçti, bank, hətto de marşrut ranəndon vasitə se iddio bedə.
1978-minə sor təvəlludin Nəzakət Məmmədova ıştəni taxsikor zınedə ni. Bə devləti xəyonət ittihomi beəsos be, de hiç qılə xususi xıdmət orqani məxfi ko nıkarde və  pul nısəneş bəyon kardə.
Əy, Moskvadə dəvonə tədbironədə, konfransonədə iştirok karde, mətbuatədə məqalon ro qonoraron vığandə be votəşe. 
Əmmo məhkəmə əçe votəyonış bənə ıştənimıdafiə və məsuliyyətiku bə kəno mandeş zınə.
Azərboycon nominə məmləkətədə dastqirxonon de alternativ fikon qəp jə xonəxon de pesoxtə bə İroni, bə Rusiya ko karde ittihomi pur bıbonən, ın proses  dəvom kardedə.