SOCAR-i navkonə vitse-prezidenti zoə anqıl məhkəmə mərəşulə

Bə SOCAR-i navkonə vitse-prezidenti Mikayıl İsmayilovi zoə Orxan İsmayilzodə vəynə “pıəti muəyyən karde və aliment tələb” i band xeyli fəxte dəkəşə məhkəmə proses bə orəx rəsə. Sabunçu Rayon Məhkəmədə Fidan Abbasova iddio ro bekardə ğəror bə Orxan İsmayilzodə əleyh bə.

Orxan İsmayilzodə, pıəti muəyyən karde ro məhkəmə təyin kardə ekspertiza dəvardeku imtino bıkoən, məhkəmə de əlidə sobut-dəlilon əçe Fidan Abbasova 2015-minə sor təvəlludunə kinə pıə be, bo əçe oğəte ro Orxan İsmayilzodə  aliment doe ğərorış bekardə.
Fidan Abbasova bə məhkəmə de Orxan İsmayilzodə mınasibəton təsdığ kardə sobuton, əz cumlə ıştə və kinə de əy bə ico foto iyən video təğdimış kardə.
Məhkəmə tədğiğədə məlum bə ki, SOCAR-i vitse-prezidenti zoə de milyonon ğıymətədə mılkon, “Hummer”, “Porsche” markaninə avtomobilon,, obyektonış bıboən, Sabunçu Rayon Məhkəmə əçe ha manq cəmi 500 mənot aliment doe ğərorış doə.
Orxan İsmayilzodə Sabunçu Rayon Məhkəmə çın ğəroriku norozi be ro apelyasiya şikotış kardə. Bə şikoti omə rujonədə Boku Apelyasiya Məhkəmədə diyə kardə bəbe.
Fidan Abbasova 2017-minə soriən pıəti muəyyən karde band məhkəmədə iddioş ros kardə be. Əmmo peşo iddioş bə dumo peğətə be. Əv ın qəmi SOCAR-i navkonə vitse-prezident – Orxan İsmayilzodə pıə Mikayıl İsmayilovi tərəfo bə daşt dənoe izoh kardə.
1964-minə sor təvəlludin Mikayıl İsmayilov 2005-2021-minə soronədə SOCAR-i vitse-prezident, 2021-minə sorikuən  “Ekol Mıhəndis Xıdməton” şirkəti Direktoron Şura sərdore.